Búgin oblys ákimi Janseıit Túımebaev pen «Báıterek» Ulttyq basqarýshy Holdıńi» AQ Basqarma tóraǵasy Erbolat Dosaev Qazyǵurt aýdanynda bolyp, birqatar kásiporyndar men sharýashylyqtardyń jumysymen tanysty.
Eń aldymen, olar aýdannyń Sharaphana aýyldyq okrýgindegi Indýstrıaldy aımaqta ornalasqan «Lotus Food Company LLC» jaýapkershiligi shekteýli seriktestiginiń «Tez ázirlenetin taǵamdar» óndirisimen jáne aýyl sharýashylyǵy salasyna arnalǵan bıoorganıkalyq tyńaıtqyshtar shyǵaratyn fabrıka jumysymen tanysty. Jobalyq quny 472 mln. teńgeni quraıtyn kásiporyn jylyna 620 myńnan asa qaptama ázirleýge qaýqarly. Ónimdi Respýblıka aýmaǵynyń barlyq qalalaryna ótkizý josparda bar. Kúndelikti turmysta joǵary suranysqa ıe, tez daıyndalatyn ónimder shyǵaratyn kásiporyn 48 adamdy jumyspen qamtýda.
Qazirgi tańda aýdandaǵy ındýstrıaldyq aımaqta 5,8 mlrd. teńgelik 7 joba maquldanyp, osy jyly jalpy somasy 722,7 mln.teńgelik 2 joba Indýstrıalandyrý kartasyna engizilidi. Olar «Otyrabat Qurylysy» JSHS-nyń quny 120 mln. teńgelik gazoblok óndirisi men «Asyl Bastaý KZ» JSHS-niń quny 602,7 mln. teńge bolatyn maısyzdandyrylǵan qurǵaq sút jáne sary maı óndirý jobalary.
Munan soń, oblys ákimi bastaǵan delegattar Qyzylqıa aýyl okrýgindegi 500 gektardan astam jerge qarqyndy baý sharýashylyǵyn damytyp otyrǵan «Amankeldi» JSHS-niń jumysyn aralap kórdi. Alma, alhory, shabdaly, shıe, júzim jemis-jıdekterin ósiretin seriktestik ónimderin Qazaqstan aýmaǵynan bólek, Ózbekstan, Aýǵanstan, Tájikstan Respýblıkalaryna shyǵarýda. Sondaı-aq, olar mundaǵy jemis-jıdekter men kókónisterdi saqtaıtyn syıymdylyǵy 2 myń tonnalyq qoımany jáne tuqym baǵynda óndiriletin alma men júzim kóshetterin kórdi.
Sapar barysynda sharýalardyń jumysymen tanysqan óńir basshysy tuqymbaqtaǵy óndiriletin kóshetterdi keńinen nasıhattap, ózge de aýdandarǵa usynýdy tapsyrdy. «Elbasy Ońtústikke jasaǵan bir jumys saparynda oblystyń kókónis pen jemis-jıdek óndiretin naǵyz «fabrıkaǵa» aınalýǵa barlyq múmkindigi bar degen bolatyn. Osy múmkindikti barynsha qoldaný úshin barlyq aýdan, qalalap atalǵan seriktestikten tájirıbe alyp, baý-baqsha sharýashylyǵyn damytýymyz kerek»,-dedi ákim.
Óz kezeginde Erbolat Dosaev shaǵyn jáne orta kásipkerliktiń damýyna qashanda qoldaý kórsetiletinin aıtyp, oblystaǵy óndiriletin ónimderdi ózge de óńirlerge keńinen tanystyrý qajettigine toqtaldy. Osy kúni delegattar 326 oqýshy bilim alatyn Jambyl Qapparov atyndaǵy №5 mamandandyrylǵan fızıka-matematıkalyq mektep-ınternatynyń tynys-tirshiligimen tanysty. Bul oqý ornynda bilim berý qazaq jáne orys tilderinde júrgiziledi. Mekteptiń janynda 300 oryndyq jataqhana da bar.
Aıta keteıik, búgin Ońtústik Qazaqstan oblysyna jumys saparymen «Báıterek» Ulttyq basqarýshy holdıńi» AQ basqarma tóraǵasy Erbolat Dosaev bastaǵan «Báıterek development» AQ-nyń basqarma tóraǵasynyń orynbasary A.Qurtaev, «Damý» kásipkerlikti damytý qory AQ basqarma tóraǵasy Q.Tileýshın, «BRK-Lızıng» AQ Basqarma Tóraǵasy N.Baıbazarov, «Turǵyn úı qurylysynyń kepildendirý qory» Basqarma Tóraǵasy D.Onaev, «Kazakhstan Project Preparation Fund» JSHS-niń Basqarma Tóraǵasy Á.Ótembaev, «Qazaqstannyń damý banki» AQ-nyń basqarma tóraǵasynyń orynbasary A.Sarqulov, «NUH «Báıterek» AQ basqarma tóraǵasy hatshylyǵynyń jetekshisi A.Shamshınder syndy birqatar holdıńtiń enshiles kompanıa basshylary kelgen bolatyn. Sapary barysynda olar óńirdegi turǵyn úı qurylysy men kásipkerlikti damytý boıynsha jıyn ótkizip, qaladaǵy salynyp jatqan turyn úı qurylysymen jáne Shymkenttegi birqatar kásiporyndar jumysymen tanysty.
Pikir qaldyrý