«Aýyl» partıasynyń Ońtústik Qazaqstan oblystyq fılıaly «Aýyldyń gúldenýi – Qazaqstannyń gúldenýi»taqyrybynda jastar forýmyn ótkizdi. Shara «Jas tolqyn» jastar qanatynyń bastamasymen uıymdastyryldy. 

Forýmǵa «Aýyl» partıasynyń ońtústik qazaqstan oblystyq fılıalynyń saıası keńes músheleri, oblystyq ardagerler keńesi, oblystyq bilim basqarmasy, oblystyq jastar saıasaty máseleleri jónindegi basqarmasy, oblystyq jumyspen qamtýdy úılestirý jáne áleýmettik baǵdarlamalar basqarmasy, oblystyq aýyl sharýashylyǵy basqarmasy, oblystyq «Ádet-ǵuryp jáne salt-dástúr ortalyǵy», oblystyq jastar ortalyǵy, Shymkent qalasy ishki saıasat bóliminiń «Jastar resýrstyq ortalyǵy», «Ontustik» kásipkerlerge qyzmet kórsetý ortalyǵy, «Qazaqstan aýyl jastar odaǵy» korporatıvtik qory, «Nur Otan» partıasynyń «Aq jol» partıasynyń, Qazaqstan komýnıstik halyq partıasynyń fılıaldary, joǵary jáne orta arnaýly oqý oryndarynyń stýdentteri men BAQ ókilderi qatysty.

El Prezıdenti N.Á. Nazarbaev halyqqa «Máńgilik El» ulttyq ıdeıasyn jarıa etti.

«Aýyl» partıasy úshin, basty maqsat – halqymyzdyń  dástúrli qundylyqtaryn damytý,  Otanymyz-Qazaqstannyń táýelsizdigin baıandy etý, «Máńgilik Eldi» nyǵaıtyp, bekitý» dep atap ótti partıanyń ońtústik Qazaqstan oblystyq fılıalynyń tóraǵasy Qanatbek Dosalıev. 

Onyń aıtýynsha, «elimizdiń  8,0 mln. halqy nemese 45%  aýylda tursa, ońtústik qazaqstan oblysynda bul kórsetkish 55% quraıdy. (Jalpy 2016 jyldyń 1 qańtaryna OQO halyq sany 2 840 557, onyń 1 277 356 qalada tursa, 1 563 201 aýylda turady.) ıaǵnı halyqtyń teń jartysy aýyldyq aımaqtarda turady. Sondyqtan aýyldy damytý arqyly memlekettiń áleýmettik-ekonomıkalyq jaǵdaıyn kóterýge bolady.

Forýmǵa qatysýshylar «Qazaqstandy qarqyndy damytatyn, el táýelsizdigin máńgi etetin - bilimdi urpaq» ekenin basa aıtty. «Jastar óz Otanyn súıetin ultjandy, patrıot bolýlary kerek. Patrıotızm bizdiń qazaqstandyq jastar úshin etnostardy bólshekteıtin, jikteıtin, bir-birine qarsy qoıatyn kúsh emes, kerisinshe, biriktiretin kúsh retinde qalyptasýy tıis, jáne olardyń mentaldyq bolmysynda qaǵıda retinde qalyptasýy qajet»- deıdi olar.

Jastardyń basym bóligi aýylda turatyndyǵyn eskere otyryp, olardyń boıynda óz týǵan jerine degen mahabbat pen atamekeniniń keleshegine degen jaýapkershilik sekildi qasıetterdi sińirý mańyzdy. Osy maqsatta jastar arasynda forým ótkizýdiń orny erekshe.

 «Aýyldyń gúldenýi – Qazaqstannyń gúldenýi» forýmynda memlekettik mekemeler, qoǵamdyq birlestektermen birlesip, jastar arasynda kóńil bóletin, birigip sheshetin kóptegen máseleler tóńireginde sóz qozǵaldy. Olar:

• Aýyl ınfraqurylymyn damytý, jol, taza aýyz sý,  jaryq, gazben tolyq qamtý máselelerin sheship, qala men aýyl arasyndaǵy alshaqtyqty tómendetý;
• Aýyldarda kishi jáne orta bıznesti damytýdy belsendi túrde júrgizý;
• Aýyl jastarynyń bilim deńgeıin kóterý;
• Aýyl jastarynyń salaýatty ómir saltyn qalyptastyrýǵa yqpal jasaý; ıaǵnı sport keshenderi men mádenıet úıleriniń jumysyn jandandyrý;
• Aýyl jastarynyń mádenıetin kóterý jáne tasada qalyp jatqan talantty jastardy qoldaý maksatynda konkýrs, jobalardy iske asyrý baǵyttarynda órbidi.

 Dóńgelek ústeldi ótkizýdiń maqsaty: Jastardyń týǵan aýylyn kórkeıtýge, Otanyn, Elin súıýge, olardyń patrıottyq sezimderin qalyptastyrýǵa yqpal jasap, Elimizdiń ósip-órkendeý jolynda úles qosýǵa tartý. Sonmen qatar, aýyl mádenıetin kóterip, qazirgi zamanǵy myqty jáne básekege qabiletti aýyl sharýashylyǵyn órkendetý, aýyldyń gúldenip, kórkeıýine at salysý bolyp tabylady.

http://auyl.kz/