Tókken ter men eńbektiń jemisti, jeńisti toıy – «Altyn kúz» merekesi Ordabasy óńirinde saltanatty túrde atap ótildi. Bul kúni sharýalar ónimderin jármeńkege shyǵaryp, sondaı-aq, aýylsharýashylyq tehnıkasynyń, asyl tuqymdy mal kórmesin uıymdastyrdy. Bul týraly aýdan ákimdiginiń resmı saıty ashyq aqparatty qamtamasyz etý úshin halyqqa jarıalap otyr. 

Jeri shuraıly, azamattary eńbeksúıgish, yntymaǵy men birligi jarasqan Ordabasy óńiri Táýelsizdigimizdiń 25 jylynda turaqty damý jolyna túsip, elimizdiń ilgeri basýyna ózindik úlesin qosyp keledi.  1995 jyly Ońtústik Qazaqstan oblysy boıynsha barlyq aýylsharýashylyq qurylymynyń sany 8275-ti qurasa, onyń 158-i ıaǵnı 1,9 paıyzy ǵana osy aýmaqtan bolatyn. 21 jylda bul kórsetkish oblysta 72 417-ge jetse, búginde ordabasylyqtardyń úlesi 5505-ke turaqtady. 

Bul jalpy oblystaǵy aýylsharýashylyq qurylymnyń 7,6 paıyzyn quraıdy. Jalpy, Ordabasy aýdany bıylǵy jyldy da aýyl sharýashylyq ónimderi boıynsha jaqsy kórsetkishtermen aıaqtady deýge negiz bar. Atap aıtsaq: «Sybaǵa» baǵdarlamasyn júzege asyrý boıynsha oblys kórsetkishi 20 173 iri qara maldy qurasa, onyń 5,2 paıyzdyq úlesi /1066 iri qara/ Ordabasyǵa tıesili; «Altyn Asyq» baǵdarlamasymen 2903 ýaq mal alyndy. Bul oblystyq kórsetkishtiń 9,2 paıyzy. «Qulan» baǵdarlamasymen alynǵan 741 asyl tuqymdy jylqynyń oblystaǵy úlesi 16,5 paıyzdy qurady. Aǵymdaǵy jyly aýyl sharýashylyǵy daqyldarynyń egistik alqaby 357 gektarǵa artyp, 54 357 gektardy qurady. Ótken jylmen salystyrǵanda maqtanyń egistigi – 62 paıyzǵa, bıdaıdyń egistigi – 32 paıyzǵa, kartoptyń – 3,7 paıyzǵa ulǵaıdy.   Aýdanda bıyl 30 259 tonna bıdaı, 15 028 tonna maqta, 68 650 tonna kókónis, 43 500 tonna baqsha ónimderi jınaldy. Aýyldardyń ereksheligi eskerilip, ónimdilikti arttyrý boıynsha atqarylǵan jumystyń nátıjesinde 5 aýylsharýashylyq óndiristik kooperatıv quryldy. Endigi kezekte, aýyldyq okrýgterde MTS ashýdy josparlaýdamyz.  Bórjar aýyl okrýginde ıntensıvti baý sharýashylyǵy qolǵa alynyp, «Aleksandrovskıı sad» jaýapkershiligi shekteýli seriktestigi 17 gektar jerge jańa tehnologıamen tamshylatyp sýarý ádisi arqyly kún ótkizbeıtin setka arqyly baý egýmen aınalysýda. Kásiporyn 2016 jyldyń 30 naýryzynan iske qosylyp, búgingi tańda 30 adamdy jumyspen qamtydy. Aǵymdaǵy jyly aýdanda 500 gektar jańadan jemis baýlary egildi. Onyń ishinde, qarqyndy baý jobasy 97 gektarǵa iske asyryldy. Tórtkól, Bógen, Jeńis jáne Qaraqum aýyl okrýgterinde maqta sharýashylyǵyn damytýdy, bul óńirlerde maqta egisin 9000 gektarǵa jetkizý josparlanyp otyr.  Osy oraıda, sýarmaly jerlerdiń jaǵdaıyn jaqsartý jáne jańadan sýarmaly jerlerdi aınalymǵa qosý úshin taǵy 187 tik drenajdy iske qosýǵa jumys jasalmaq.  Bıyl aýdan boıynsha jylyjaılardyń kólemi 7,18 gektarǵa ulǵaıǵany da – úlken jetistik.

http://rgmedia.kz/