Búgin Ońtústik Qazaqstan oblysynyń ákimi Janseıit Túımebaev koreıalyq «J&I Company Ltd» kompanıasynyń tóraǵasy Changsık Chonmen kezdesti. Basqosýda taraptar Shymkent qalasyn kógaldandyrý jaıyn áńgimelep, birqatar jobalar boıynsha pikir almasty.

Atap aıtqanda, koreılik kásipker aımaq basshysyna Ózbekstandaǵy dekoratıvti aǵashtar ósirýmen aınalysatyn tuqymbaǵyn tanystyryp, ondaǵy jasyl jelekterdi baptaýdyń erekshelikterin baıandady. Shymkent qalasynyń klımattyq jaǵdaıyn eskergen Janseıit Qanseıituly kóshetterdi, aldymen, synaq retinde bizdiń aımaqta ósirip kórý kerektigin aıtty.

Sonymen qatar, Ońtústik Qazaqstanǵa sapary barysynda koreılik bıznesmen Shymkent qalasynda gólf klýbyn, jastar saıabaǵyn, dekoratıvti aǵashtarǵa arnalǵan tuqymbaq qurý jáne eskek esý sporty boıynsha sport keshenin salýdy usyndy.

Óz kezeginde, oblys ákimi atalǵan usynystardy qarastyratynyn jetkizip, kompanıanyń Ózbekstandaǵy tuqymbaǵynyń jasyl jelekterin zertteýge Ońtústikten arnaıy delegattardy jiberetinin aıtty.

Eske salaıyq, taıaýda oblys ákimi Shymkent qalasyn kógaldandyrý boıynsha qala ákimdigine syn-eskertpeler aıtyp, osy baǵyttaǵy jumystardy jandandyrý maqsatynda birqatar tapsyrmalar bergen bolatyn. Elimizdiń úshinshi megapolısi sanalatyn Shymkenttiń kógaldandyrý jumystaryna erekshe mán bergen ákim bul máseleni jeke baqylaýyna alyp otyr.

Aıta ketý kerek, koreıalyq «J&I Company Ltd» kompanıasy naryqta 10 jyldan beri kógaldandyrý salasynda qyzmet etip kele jatqan seriktestik. Ońtústik Koreıa men Ózbekstanda sátti jobalaryn bastaǵan kompanıa Qazaqstanda da óz bıznesin damytýy josparlap otyr.

http://adym.kz/