«Ońtústik Qazaqstan oblysy respýblıkadaǵy aýyl sharýashylyǵy salasynyń lokomatıvine aınalyp keledi. Sońǵy 3 jylda baqsha daqyldarynyń jyl saıynǵy jınalýy 1 mln. tonnadan asady. Respýblıkadaǵy jylyjaı sharýashylyqtarynyń 87℅ bizdiń óńirde ornalasqan. Oblys respýblıka boıynsha maqta kóleminiń 100℅, júzim men baqsha daqyldary kóleminiń 70℅ quraıdy», - dedi OQO-nyń ákimi J.Túımebaev «AgriTek Shymkent’2016» V halyqaralyq mamandandyrylǵan aýyl sharýashylyǵy kórmesiniń ashylý saltanatynda.

  Halyqaralyq sharada Qazaqstannan bólek, Reseı, Túrkıa, Germanıa, Ispanıa, Ulybrıtanıa syndy sheteldik kompanıalar kelýshilerge óz ónimderin usyndy. Atap aıtqanda, sharaǵa qatysyp jatqan 50-den astam kompanıa ókilderi aýylsharýashylyq tehnıkasy men jabdyqtaryn, qosalqy bólshekterdi, sýarý jáne tyńaıtý tehnologıalaryn, jylyjaılardy, tuqymdar men ekpelerdi, tyńaıtqyshtardy, ósimdikterdi qorǵaý quraldaryn, mal sharýashylyǵyna arnalǵan tehnologıalardy, veterınarlyq tehnologıalardy ońtústikqazaqstandyq kásipkerlerge keńinen tanystyrdy.

Kórmeni aralaý barysynda oblys ákimi otandyq taýaróndirýshilerdiń ónimderine aıryqsha kóńil bólip, ony ótkizýdiń túrli joldaryn qarastyrý arqyly saýda-sattyqty jandandyrý qajettigin aıtty.

Jalpy, óńirdiń aýyl sharýashylyǵyndaǵy jetistikterine toqtalsaq. Bıyl aımaqtaǵy ósimdik sharýashylyǵy salasyn ártaraptandyrý nátıjesinde 1991 jylmen salystyrǵanda baý-baqsha daqyldarynyń egis alańy 49 myń ga-ǵa ulǵaıyp, 59 myń ga qurady. Iaǵnı, kókónister kólemi 27 myń gektarǵa kóbeıip, 40,4 myń ga boldy. Sondaı-aq, jemis-jıdek daqyldary men júzimniń egistik alańy 30 myń ga jetti.

Bıylǵy maýsymda jınalǵan jemis-jıdek daqyldarynyń túsimdiligi 85,0 s/ga bolsa, júzim 100 s/ga qurady. Tonnaǵa shaqsaq, jalpy jınalǵan jemis-jıdek kólemi 126 myń tonna, al júzim - 63 myń.tn qurady.

Agroónerkásip kesheni mamandarynyń ózara tájirıbe almasyp, jańa tehnologıalarmen bólisý, sonymen qatar, birlesken bıznes-jobalardy qurýyn maqsat tutqan kórme 11 qarashaǵa deıin jalǵasady.

Aıta keteıik, Ońtústik Qazaqstan oblysynda júzege asyp jatqan «Ashyq ákimdik» jobasy boıynsha memlekettik organdar ózderiniń atqarǵan jumystaryn halyqqa jetkizip, kez-kelgen aqparattardyń qoljetimdiligin qamtamasyz etýde.

http://rgmedia.kz/