Búginde jeke kásibin ashyp, tasyn órge súıreýge bel býǵan ár azamatqa memleket mol múmkindikter berip otyr. Atap aıtqanda, OQO Ákimdiginiń «ONTUSTIK» Kásipkerlerge qyzmet kórsetý ortalyǵynan 2012 jyldan beri 110 myńnan astam adam kásibı keńes alǵan. Sondaı-aq, ortalyq arqyly 10 myńnan astam ruqsatnama qujattar, 3 myńnan astam bıznes jáne market josparlar ázirlengen. Munyń ishinde 4 myńnan astam jobaǵa qarjylaı qoldaý kórsetilgen. 27 myńnan astam tyńdaýshy «Kásipkerlik mektebinde» oqytylyp, onyń 1 248-i óz isin bastady. Osy múmkindikterdi paıdalana otyryp, búginde mal bordaqylaýdy qolǵa alǵan kásipkerdiń biri – Álisher Ýbaıdýllaev.

Beınettiń zeıneti

40 jyldan astam ýaqyt Shymkenttegi fýtbol mektebinde jattyqtyrýshy bolyp jumys istegen Álisher Ýbaıdýllaev zeınetke shyqqannan keıin jeke kásippen aınalysý úshin úıindegi iri qarasyn kóbeıtýdi oılaıdy.

– Buryn úıde únemi úsh saýyn sıyr bolatyn. Olardyń jumysy úıdegi áıel zatynan artylmaıdy. Sút-qaımaǵyn alyp, bazarǵa satyp, az-maz qajettiliktiń ornyn toltyryp júretin. 

Zeınetke shyqqanda qarap otyra almadym. Úıdegilermen aqyldasa kele, sıyr basyn kóbeıtetin boldyq. Mal baǵý – tabysty kásip. Onyń ústine, «Danýna» JK retinde aýyl sharýashylyǵyna arnalǵan 20 gektar jerim bar. «Yrys» shaǵyn nesıelendirý uıymynan 500 myń teńge nesıe alyp, iri qarany kóbeıttim, – deıdi kásipker.

Shaǵyn nesıeni úsh jyl tólepti. Aýyl sharýashylyǵyna arnalǵan jerinen maldyń jem-shóbin óndirip otyrǵan. İri qarasynyń sany artqan soń Álisher Pirnazaruly «Danýna» JK retinde qujattaryn qaıta rásimdep jerdi paıdalaný maqsatyn ózgertedi. Jer teliminiń bir bóligine buzaý, taıynsha, qunajyn, besti sıyrlarǵa arnap, aınaldyra bólek-bólek qora salǵan eken.

– Jumystyń kóbeıgeni kásiptiń keńeıgenin bildiredi. Demek, biz soǵan laıyqtalýymyz kerek. Mal bordaqylaýdan túsken tabysty tek kásipti keńeıtýge jumsap otyrdyq. Kásipti keńeıtýdiń joldaryn, qarajatty basqarýdy, qujattardy rásimdeýdi «ONTUSTIK» Kásipkerlerge qyzmet kórsetý ortalyǵy Saıram aýdandyq fılıalynyń mamandary úıretip keledi, – deıdi Á.Pirnazaruly.

Asyl tuqymdy «Áýlıekól»

«Kásipkerlik mektebinde» oqyp, sertıfıkat alǵan Álisher Pirnazaruly ótken jyly sıyrdyń «Áýlıekól» atty etti tuqymynan 2 taıynsha satyp alypty. Asyl tuqymdy iri qaraǵa bólinetin sýbsıdıany da mal bordaqylaý isine jumsaǵan ol kásipkerlikke shyndap kirisedi.
– Sıyrdyń «Áýlıekól» degen tuqymy bizdegi aýa raıyna tez beıimdeledi. 2 jasqa qaraǵan ógizshelerdiń salmaǵy jarty tonnaǵa jýyq bolady. 
2015 jyly 2 taıynshaǵa «Sybaǵa» memlekettik baǵdarlamasy arqyly sýbsıdıa aldym. Sol 1 mıllıon teńgeden astam qarajat bizge edáýir kómek boldy. Jer aldyq. Jaz maýsymynda jaıylymǵa arnalǵan jerdi aýylymyzǵa jaqyn ornalasqan Tóle bı aýdanynan jalǵa alamyz. Taýly aımaqtyń óte qunarly shóbin jegen iri qaranyń eti dámdi bolady. Búgingi tańda «Áýlıekól» tuqymynyń alǵashqy tólin alyp úlgerdik. Jaqynda taǵy 10-20 sıyr buzaýlaǵaly tur. Endi qoramyzdy keńeıtý jumystaryna kirisip jatyrmyz, – degen Álisher Ýbaıdýllaev qurylys jumystarymen tanystyrdy.