Ońtústik Qazaqstan oblysynyń ákimi Janseıit Túımebaev 110 myńnan astam halqy bar Túlkibas aýdanyna jumys saparymen bardy. Ákim bastaǵan jumysshytop aldymen Arys aýyldyq okrýgindegi bekire tuqymdas balyq ósirý sharýashylyǵy men at sporty mektebiniń jumysymen tanysty.
Respýblıkamyzda sırek kezdesetin bekire tuqymdas balyq ósirý fermasy 2012 jyly óńirlik ındýstrıaldy karta sheńberinde iske qosylǵan. Jobany iske asyrýshy – «Aqsanat Injınırıń» JSHS.
Kásiporyn jumysymen tanystyrǵan Erik Ospanov jobanyń quny 452 mln. teńgeni quraǵanyn aıtyp, búginde jylyna 40 tonna balyq eti men 30 keli qara ýyldyryq ónimin óndirip jatqanyn málimdedi.
Balyq sharaýshylyǵyn kásipkerlerge keńinen nasıhattaý qajettigin aıtqan oblys ákimi osyndaı balyq fermalaryn kórshiles Tólebı, Saryaǵash syndy aýdandarynda da damytýdy tapsyrdy.
Jumys sapary barysynda aımaq basshysy «Aqsanat Injınırıń» JSHS qarasty at sporty mektebin aralady. Eki jyl buryn ashylǵan at sporty mektebinde 24 asyl tuqymdy jylqy bar. Jobanyń jalpy quny 10 mln. 500 myń teńge. Arys aýyldyq okrýginde uıymdastyrylǵan aýylsharýashylyq ónimderiniń kórmesine qatysqan ákim jergilikti eńbekshilermen kezdesip, oı bólisti. Aýyl sharýashylyǵy salasyna sýbsıdıa bólinetinin de atap ótti.
Osy kúni J.Túımebaev T.Rysqulov aýyly, «Jankent» móltek aýdanyndaǵy 600 oryndyq jańa mekteptiń qurylysymen tanysyp, bilim uıasynyń mańyna alǵashqy kóshetti otyrǵyzdy. Oblystyq búdjet esebinen salynǵan 3 qabatty mektepte oqýshylarǵa barlyq jaǵdaı jasalǵan. Odan keıin óńir basshysy atalǵan shaǵyn aýdanyndaǵy jańadan salynǵan 64 jáne 32 páterli turǵyn úıdi aralap kórdi.
Birneshe áleýmettik nysandy aralap, atqarylǵan jumystardy kórgen oblys ákimi aýdan aktıvimen kezdesti. Jıynda Túlkibas aýdanynyń ákimi Áýelhan Turǵymbekov áleýmettik-ekonomıkalyq damý kórsetkishteri boıynsha atqarylǵan jumystar jaıyn baıandady. Búginde aýdannyń jalpy óńirlik kólemi 40,8 mlrd. teńgeni qurap otyr. Ónerkásip, aýyl sharýashylyǵy salalarynda da jumys bar. Degenmen, oblys ákimi Túlkibas aýdanynyń áleýmettik-ekonomıkalyq áleýeti zor ekenine toqtalyp, óz potensıalyn tolyq paıdalanbaı otyrǵanyn aıtty.
«2016 jylǵy 1 qarashaǵa Túlkibas aýdany boıynsha 155,4 mln. teńge qarjy ıgerilmegen. Al ónerkásibi óniminiń jalpy kóleminde Túlkibas aýdanynyń úlesi 2,1% qurady, bul kórsetkish ótken jyldyń sáıkes merzimine qaraǵanda 0,9 paıyzǵa tómendegen. Aýdandaǵy shaǵyn jáne orta kásipkerliktiń sany 6 186 birlik bolsa, ótken jyldyń tıisti kezeńimen salystyrǵanda 7,8% tómendegen. Investısıa tartý boıynsha da 14 orynda tursyzdar. Al toqtap turǵan «EkoPrdýktGrýpp» kásiporynyn iske qosý jáne bos turǵan «Sana» JSHS kásiporyndary syndy ǵımarattardy tıimdi paıdalanbaısyzdar. Túlkibasta 21 myń gektar jerge kúzdik egý jumystaryn júrgizý kózdelse, onyń jartysy ǵana oryndalǵan. Densaýlyq saqtaý jáne bilim salasynda da kemshilikter bar. Jasóspirimder qylmysy, sýısıd máseleleri de kún tártibinde tur. Bizdiń basty maqsat – aýdan turǵyndaryna qolaıly jaǵdaılar jasaý. Sondyqtan jumysty shıratý kerek»,-dedi oblys ákimi.
Týrızm salasynyń damýyna kóńili tolmaǵan ákim Tóle bı aýdanynda 40-tan astam demalys jáne qonaq úı keshenderi ornalasqanyn aıtyp, tabıǵaty keremet taýly aımaqta budan áldeqaıda az ekenine toqtaldy.
Jıyndy qorytyndylaǵan Janseıit Qanseıituly týrızm baǵytyn, potensıaldy paıdalana otyryp shaǵyn jáne orta kásipkerlikti damytýdy aıtty. Sonymen qosa, aýyl sharýashylyǵy salasyna túbegeıli taldaý jasap, baý-baqsha ósirý, aýyl sharýashylyǵyn damytý baǵytynda naqty is-jospardy bekitýdi, jumyssyzdyqty azaıtý boıynsha tıisti jumystardy atqarýdy tapsyrdy. El Táýelsizdiginiń 25 jyldyǵyn joǵary deńgeıde atap ótý jóninde de jergilikti bılikke birqatar mindettemeler júktedi.
OQO ákiminiń baspasóz qyzmeti
