Reseı Federasıasynyń Ekonomıkalyq strategıalar ınstıtýty Qazaqstannyń damý tarıhyn zerttep, ekonomıka, tabıǵı resýrstar, syrtqy saıasat, bilim-ǵylym, áskerı daıyndyǵy, terıtorıalyq mártebesi jáne taǵy basqa salalardaǵy kúsh-qýatyn zerdelegen dep habarlaıdy Egemen Qazaqstan basylymy.

Bul týraly osy ınstıtýttyń dırektory, profesor Aleksandr Ageev «Qazaqstan Respýblıkasynyń Táýelsizdigine 25 jyl: nátıjeler, jetistikter, keleshek kókjıegi» taqyrybyndaǵy xalyqaralyq konferensıada aıtqan. Konferensıaǵa Túrkıa, Reseı, Fınlándıa, sondaı-aq Eýropalyq odaqtyń ókilderi qatysqan.

«Osy oraıda Táýelsizdiktiń 25 jyly — ol «memleketke 25 jyl tolyp otyr» degendi bildirmeıdi. Osyny umytpaý qajet. Memlekettiń ózine myń jyl, ǵasyrlardan da kóp. Sondyqtan ár ýaqytta Qazaqstannyń kúsh-qýaty árqalaı boldy. Máselen, Qasym xan, Esim xandardyń tusynda Qazaqstan uly aımaqtyq derjava dárejesine deıin kóterilgen. Reseı ımperıasy quramynda da ártúrli kezeńder boldy. Sosyn keńester kezinde Qazaqstan derbes memleket bolmasa da, ol memlekettiń bolǵanyn moıyndaýymyz qajet», — dedi Ageev.

Onyń aıtýynsha, zertteýdiń on kórsetkishi boıynsha 1981 jyly Qazaqstan keńester quramynda bolsa da, aımaqtaǵy yqpaldy memleketke aınalǵan.

«Al 91-shi jyly basqalarmen birge onyń dárejesi kúrt tómendep ketti. Myna jerde Qazaqstannyń perıfırıalyq memleket bolǵany jaıynda aıtyp jatyr. Men ózim bul pikirmen kelispeımin. Sebebi ol keńester quramyndaǵy oq boıy ozyq elderdiń biri edi. Iá, Baıqońyr, ýran jáne taǵy basqa sırek metaldar polıgondary Máskeýdiń qaramaǵynda boldy. Degenmen, 91-shi jyldarǵa deıin Qazaqstan jetekshi óndiristik-agrarlyq memleket bolyp qalyptasa bildi. Endi, qazirgi ýaqytpen salystyrǵanda, sizder barlyq faktorlar boıynsha úlken progres jasadyńyzdar. Bunyń bári — tamasha jetistik», — dep atap kórsetti reseılik maman.

Eske salatyn bolsaq, 2014 jyly RF-nyń prezıdenti Vladımır Pýtın «Selıger» jastar forýmynda Qazaqstanǵa qatysty saýal qoıǵan qyzǵa bergen jaýabynda «Qazaqtarda eshqashan memleket bolmaǵan» dep edi.