Ońtústiktegi sharýalardyń bir ereksheligi olar qashan da jańa tehnologıaǵa beıimdelýge, jerdi ıgerý kezinde tıimdi jańa tehnıkalardy iske qosýǵa bir sózben aıtqanda jańashyldyqqa epti keledi. Osy oraıda aıta keter jaıt Ońtústik Qazaqstan oblysy búgingi tańda elimizdegi maqta egiletin birden bir oblys.
Olar maqta egý kezinde de jer jyrtýdyń úırenshikti ádisinen bas tartyp jańa tehnologıamen ónim alýdy maqsat etti. Esesine maqta shıtin tereń qopsytý tehnologıasyn meńgerip, óńdelgen egis alqaptaryn paıdalanýǵa den qoıdy. Bul ádis jer qyrtysynda jyldar boıy paıda bolǵan shógindi tuzdar men zıandy zattardyń qabatyn joıyp, ósimdik tamyrynyń erkin jaıylýyna múmkindik beredi eken. Sondaı-aq sońǵy jyldary tuqym egýmen qatar aram shópter men zıankesterge qarsy kúres sharalarynda da jańashyldyq bar.
Jańa tehnologıa boıynsha tyrmanyń tisi jerdiń qyrtysyn 60-70 santımetr tereńdikke deıin qopsytady. Osy oraıda Ońtústik Qazaqstan oblysy Maqtaral aýdanyna qarasty "Nuralyjol-J" sharýa qojalyǵynyń ıesi Eralıev Erbol 191 ga jerge maqta daqylyn egip, jalpy 860 tonna ónim alyp, ortasha ónimdilikti 45 s/ga qurap mol jetistikke jetip otyr.
Aıta keter jaıt jańa tehnologıany serik etken sharýalar jerge soqa salmaıdy. Tek qopsytýǵa az ǵana shyǵyn jumsaıdy. Sharýalar mundaı ádis maqtadan mol ónim jınaýǵa negiz bolady dep otyr. Aldaǵy ýaqytta jerdiń ıgiligin kórý baǵytynda mundaı jańa tehnologıalar kóbirek engiziledi dep kútilýde.

https://thenews.kz/