Ońtústik Qazaqstan oblysy respýblıka boıynsha maqta egýmen aınalysatyn jalǵyz oblys bolsa, sonyń ishinde Shardara aýdanynyń maqta sharýashylyǵyna qosar úlesi zor.

Búgingi kúni Shardara aýdany boıynsha barlyq terimge túsetin jer kólemi 11298 gektarǵa jetken. Kóksý, Uzynata jáne Alataý batyr aýyldyq okrýgterinde maqta terimi jyl saıyn qarqyndy túrde júrgiziledi. Terimge túsetin jerdiń 1790 gektary defolásıadan ótkizilip, maqtany mashınamen terýge aldyn ala daıyndalǵan. Maqta terimine qatysady dep esepke alynǵan aýyl sharýashylyǵy tehnıkalary da aldyn ala tolyǵymen tekserýden ótkizilip, maqta terimi úlken jaýapkershilikpen júrgizildi. Jyl ótken saıyn bul óńirde alynatyn maqtanyń kólemi artyp kele jatqany baıqalady. Aýdan kóleminde 24 maqta qabyldaý pýnktteriniń jan – jaqty daıyndyq jumystary tekserilip (tarazy, zerthana,) qabyldaý jumystaryn júrgizýge de tolyǵymen aldyn ala daıyndalǵan. Osyndaı daıyndyq jumystarynyń arqasynda bıyl bul óńir maqta terimin abyroımen aıaqtaǵan.

Aıta keter jaıt, «Agrobıznes-2020» baǵdarlamasy aıasynda Shardara aýdany boıynsha bıyl 11 298 ga egistikke shıtti maqta sebilgen. Shardara aýdandyq aýyl sharýashylyǵy bóliminiń basshysy Talǵat Álimquldyń aıtýynsha, aýdanda jalpy 64 myń ga sýarmaly jer bar. Búgingi tańda 11 298 ga alqapqa maqta daqyly egilgen bolsa aldaǵy ýaqytta onyń kólemin eseleı túsý josparlanyp otyr. Jalpy jyldaǵydan qaraǵanda maqta baǵasy bıyl áldeqaıda joǵary bolǵan, 1 kg maqtanyń quny 146 teńge bolyp belgilengen. Maqtanyń túsimdiligi birinshi terimde 20-25 sentnerden aınaldy.

http://www.elarna.com/