Álemniń mıllıonnan asa baǵdarlama jasaýshysyn biriktiretin HackerRank platformasy ýnıversıtetterdiń kodtaý boıynsha mamandandyrylǵan baǵdarlama jasaýshylaryn daıyndaýdaǵy deńgeıin anyqtap, joǵary oqý oryndarynyń reıtıńin jasady. Tizimde almatylyq qazaq-túrik lıseıi de bar, - dep habarlaıdy Tengrinews.kz tilshisi.
Tizim qoldanýshylardyń berilgen tapsyrmalardy qalaı sheshkenine baılanysty jasaldy. Reıtıńke álemniń 126 ýnıversıteti men kolejderdiń 5,5 myńnan asa stýdenti qatysty. Árbir tapsyrma úshin ár ýnıversıtette belgili bir upaı qosylyp otyrǵan.
Osylaısha HackerRank nusqasy boıynsha, reıtıńtiń 1-ornynda Sankt-Peterbýrg aqparattyq tehnologıalar, mehanıka jáne optıka ulttyq zertteý ýnıversıteti tur. Al ekinshi bolyp Qytaıdaǵy Sun Yat-sen Memorial Middle School tursa, 3-orynǵa Vetnamdaǵy Ho Chi Minh City University of Science ýnıversıteti turaqtady. Al Almatydaǵy qazaq-túrik lıseı bolsa, reıtıńtiń 21-ornynda tur.
