QR Mádenıet qaıratkeri, Jazýshylar odaǵynyń múshesi, kompozıtor, ánshi, akter, qalamger Ermurat Zeıiphan bıyl tiri bolsa erdiń jasy 50-ge keler edi. Marqumnyń artyna qaldyrǵan rýhanı murasyn keńirek nasıhattaý maqsatynda 2016 jyldyń 7 jeltoqsanynda keshki saǵat 18.00-de Almatydaǵy M. Áýezov atyndaǵy Qazaq memlekettik akademıalyq drama teatrynda «Eki dúnıede jalǵyzym – Qazaqstan» atty eske alý keshi ótti. Keshte Ermurat Zeıiphanulynyń tańdaýly ánderin belgili óner juldyzdary oryndap, sondaı-aq, aqyn óleńderinen sahnalyq kompozısıa qoıyldy.

Bul keshti kórgen kórermenniń kópshiligi "óte jaqsy ótti" degen baǵasyn berip jatyr. Bul da bolsa Ermurat Zeıiphanǵa degen barsha qazaqtyń yqylasy men súıispenshiliginiń arqasy. Bul keshtegi bir ókinishimiz, Erekeńniń 50 jyldyǵyn ótkizip jatqanymyzda óziniń bolmaǵany ǵana, bu dúnıeni bizge qaldyryp, ózi o dúnıede «Eki dúnıede jalǵyzym – Qazaqstan» dep jatqany edi.

Ermurat aǵanyń 50 jyldyǵyn eske alý bolǵandyqtan, uıymdastyrýshylar alqasy aǵanyń ózi jumys jasaǵan Qazaqtyń Memlekettik M.Áýezov atyndaǵy akademıalyq drama teatrynda ótkizýdi basta josparlaǵan bolatyn. Keshke kelýshiler teatrdyń úsh qabat zalyna da syımaı qalyp, 2 saǵattan astam túregelip turyp kórgender de boldy. Keshke eńbektegen baladan, eńkeıgen qartqa deıin qatysty desek artyq aıtpaǵan bolar edik. Ár salanyń adamdardy kelip, "Ermurat Zeıiphannyń konserti bolady eken degendi estip keldik" dep bizden bılet surap jatty. Sózime dáıek retinde myna bir úsh balasyn kóterip kelgen, ananyń feızbýktaǵy pikirin keltireıin. Janbotan Sultanmurat: "Toqtaráli, shynyńdy aıtyp, 3 bıletti ustata salǵan saǵan myń alǵys! Ádemi keshtiń áserin balapandarym álsin-álsin áli aıtyp júr. Kók Týdyń jelbiregenin kózimen kórip, óz qulaǵymen estisin dep alyp baryp edim. Qobyzben án aıtylǵanda Ermurat marqumnyń ózi aıtyp jatqandaı áser qaldy...".

«Qobyzben án aıtylǵanda Ermurat marqumnyń ózi aıtyp jatqandaı áser qaldy» degen eken. Shynynda, bul konserttiń bir jańalyǵy osy desek bolatyndaı. Óıtkeni, bul kesh «Jıyrma bes, otyz besim, aı-haı, arlan» degen ándi qobyzben oryndaǵan Qazytaı Ahmettiń tusaýyn kesti. Shynashaqtaı ǵana bala qobyzben osy áni tamyljyta shyrqaǵanda zalda súısinbegen jan qalmaǵany anyq. Kesh sońynda surasaq, Qazytaı belgili dástúrli ánshi Erkin Shúkimannyń shákirti eken. Qurmanǵazy atyndaǵy qazaq ulttyq konservatorıasynyń 1 kýrs stýdenti bolyp shyqty. Qazytaıdyń ónerine aq jol tilep, Ermurat Zeıiphannyń taǵy da basqa ánderin oryndaýyn. Ermurat Zeıiphan tiri bolsa, aty shyqpaǵan áli talaı aqynnyń da óleńine án jazyp tanymal aqyn qylyp shyǵaratyn edi degen ókinishimizben birge, Ózi ketse de Ermurat Zeıiphannyń artynda qalǵan murasy - ánderi áli talaı ánshini juldyz jasap shyǵatynyn aıta kelip, «Erteń Ermurat Zeıiphannyń 55 jyldyǵyn ótkizer kezde, ózińe qaıta-qaıta telefon shalyp, ushaǵyńnyń bıletin alyp, qonaq úıińdi daıyndap júrip áreń ákeletin bolaıyq. Ermurat aǵanyń ánin de hıt qyl, óziń de qazaqqa tanymal ánish bol» dep ázil-shyny aralas aqyl-tilegimizdi aıttyq. Árıne, bul tek bir Qazytaıǵa ǵana aıtaqnymyz emes, Ermurat Zeıiphannyń 70 ge jýyq ánderiniń ishinen áli talaı án talaı jasty elge tanymal ánshi jasap shyǵaryna senimdimiz. Sonymen birge bul keshtiń atyna sáıkes «Eki dúnıede jalǵyzym –Qazaqstan» ánin  QR Eńbek sińirgen qaıratkeri, memlekettik syılyqtyń ıegeri, elimizdiń Ánuranyn oryndaýshy – ánshi Talǵat Kúzembaev oryndasa, Han kenege arnalǵan «Kenesary» ánin QR Eńbek sińirgen qaıratkeri Dálel Ýashov oryndap ulttyq rýhymyzdy bir kóterlip tastady. Al «Kúnes-aı» ánin oryndaǵan Kaýhar Qaspaovany da «tamasha oryndady, áserli jetkizdi» degen maqtaýlar kóp boldy. Kesh muraǵattan alynǵynan Ermurat Zeıiphannyń óziniń oryndaýyndaǵy «Kók týdyń jelbiregeni» ániniń vıdeosymen aıaqtaldy.

Esterińizge sala ketsem, 2016 jyldyń 5 jeltoqsanynda saǵat 12.00-de Qazaqstan Jazýshylar odaǵynda Ermurat Zeıiphannyń 50 jyldyq mereıtoıyna arnalǵan baǵdarlamalardy, qolǵa alynyp jatqan sharýalardy elge jetkizý maqsatynda arnaıy pres-konferensıa ótken bolatyn. Jazýshy Qabdesh Jumadilov bastaǵan ádebıet pen ónerdegi aǵalary Erekeń týraly estelikterimen bólisip, «Dúnıe ǵapyl» atty tolyq shyǵarmalar jınaǵynyń tusaýyn kesken edi. Sonymen birge, Talǵar qalasynyń ortalyǵynan kóshe beriletin bolǵanyn da aqparat quraldary shúıinshilegen edi.

Endi myń aqyn, myń sazger óleń arnap, án jazsa da "Men júrgen jaılaýdyń" bıliktigine jetip, "Kúnes-aıdyń" kórkinen asyp, "Adýyrgerdiń" aǵysyna ilesip, "Sábılerdiń" shattyǵyn jyrlap, «Túsindegi anasyna» terbelip, "kók týyńnan" asyryp týyn jelbiretip kete almas.

«Babamnyń kózderindeı kózim barsyń,

Kóktegi Táńir barda – óziń barsyń.

Táńirtaý – sen pánılik, men baqılyq,

Tym qurysa óziń jaıly sózim qalsyn». Dep ózi jyrlaǵandaı áni de, sózi de, aty da qazaq bar jerdiń bárinde qala beredi.

Turdybek Qurmethan