Sálemetsiz be, Qaırat aǵa! Álı aǵa!
Hatymdaǵy sóz basyn jasy úlken Qaırat aǵaǵa sózimdi baǵyttaımyn.
Men sizdi "aǵa" deımin. Myńdaǵan jankúıer, ónerińizdi súıer qaryndastaryńyzdyń birimin. Men osy hatty kásibime baılanyssyz túrde, Qazaqstannyń azamaty retinde jazyp otyrmyn.
Siz jaqynda ǵana «Estrada» nomınasıasy boıynsha «Daryn» memlekettik syılyǵyn ıelendińiz. Sonymen qatar «Qurmet» ordenin de Almaty ákimi Baýyrjan Baıbektiń qolynan keýdeńizge taqtyńyz.
Siz – eń áýeli ánshisiz. 10 jasyńyzda alǵash úlken sahnaǵa shyǵyp án salypsyz. 15 jyldan astam óner jolynda júrip, jastar arasynda hıt bolǵan talaı ándi shyrqadyńyz. 2006 jyly shyqqan «Arman» ánińizden beri qaraı Sizdi barsha qazaq, Qazaqstan tanıdy.
Siz, 2011 jyly Qazaqstan ulttyq arnasy uıymdastyrǵan «Eki juldyz» baıqaýyna qatystyńyz. 2012 jyly 25 aqpan týǵan kúnińizde «KN» atty jýrnalyńyzdyń tusaýyn kestińiz. 2013 jyly Baıan Esentaeva prodúserlik etken «Saz álemi» baıqaýynda «Jyl ánshisi» jáne «Jyl áni» ataǵyn jeńip aldyńyz. 9 sáýirde ózińiz basty rólin somdaǵan «Ókinish» fılmińizdiń premerasy ótti. 2014 jyly «Mýzzon» EMA-2014 premıasynda «Jyldyń úzdik ánshisi» atandyńyz. Osy jyly III Eýrazıalyq mýzyka júldesinde «Úzdik oryndaýshy» nomınasıasyn aldyńyz. «Qaırat Nurtas» tigin sehińiz jumys isteı bastady. Tuńǵysh ret Astana qalasynda ótken «MýZTV» arnasynyń arnaıy «Gravıtasıa» premıasynda halyqtyń daýys berý nátıjesinde Qazaqstannyń úzdik ánshisi atandyńyz. Almaty jáne Astana qalalarynda Qazaqstanda buryn sońdy bolmaǵan 3D shoý konsertin berdińiz. Jaqyn shetelderdegi qandastarymyzǵa baryp konsertter berip júrsiz.
Byltyr 3 shildede, jaqynda ǵana keýdeńizge orden taqqan, sol kezde «Nur otanda» qyzmette bolǵan Baýyrjan Baıbektiń qolynan partıa bıletin aldyńyz. Sol partıa sizdi Parlament Májilisiniń VI shaqyrylymy depýttaryna úmitker de etti. Biraq, sizdi depýtat etken joq. Degenmen siz osy aralyqta tilshilerge bergen suhbatyńyzda «Men depýtat bolǵym keledi. Eger meni depýtat etip saılap jatsa, nesi aıyp? Men mádenıetti damytýǵa, qazaq tiliniń máselelerine kóńil bólgen bolar em. Aýyldardyń turǵyndaryna kómekteser edim» depsiz.
Iá, men jáne meniń zamandastarym sizdiń ómirińizde, ónerińizde ne bolyp jatqanyn jaqsy bilemiz. Al, siz ózińizdiń konsertińiz óte qalsa zalǵa syımaı qalatyn qazaqtardyń turmysynda, elinde, jerinde, aýylynda ne bolyp jatqanyn bilesiz be?
Ras, siz taıaýda ǵana Aqtóbe oblysynda qaıyrymdylyq konsert berdińiz. Birli jarym balalardyń tilegin oryndaǵanyńyzdy, múgedek jandarǵa kómekteskenińizdi estımiz. Degenmen ...
Álı Oqapov myrza! Sizdi Jurt Roza Qýanyshqyzynyń uly retinde biledi. Árıne, suhbattaryńyzda «anańyzdyń etegine jarmasyp óspegenińizdi» aıtqansyz. Ánińizdi súıip tyńdamasam da súıkimdi ánshisiz. Bılep turatyn qozǵalystaǵy ánshisiz. 2013 jyly Qaırat Nurtastyń aldyn orap, EMA 2013 Eýrazıalyq mýzyka premıasynyń «Er kisiler arasynda úzdik oryndaýshy» ataǵyn jeńdińiz.
«Besh» degen klıpińizdi sol kúıi túsine almaı ketkenmin. Siz de sanaýly kún buryn Qaırat Nurtaspen birge «Daryn» memlekettik syılyǵyn aldyńyz.
***
Sizder alǵan syılyq memleketke eńbegi sińgen jandarǵa beriledi. Sizder aldy dep qyzǵanǵanym emes. Iá, árkim alyp jatyr.
Sizder bıylǵy jyly qazaqtyń taǵdyry synǵa túsken «Jer máselesinde» únsiz qaldyńyzdar. Myńdaǵan, tipti júz myńdaǵan tyńdaýshylaryńyz bola tura únsiz qaldyńyzdar.
Bıyl Jeltoqsan oqıǵasyna 30 jyl. Sol jeltoqsanǵa qatysqan jastar sizder men meniń jasymdaǵy qyrshyn jastar edi. Júzdegen jeltoqsandyq sottalyp jastyq shaǵyn pıda etti. Taǵdyrlary tálkekke tústi. Úısiz-kúısiz júrgenderi bar. Solar bılik tarapynan «nagradtalmady». Jeltoqsan bolmasa Táýelsizdik bolar ma edi? Táýelsizdik bolmasa sizder án salyp júrer me edińizder?
Táýelsiz 25 jylda biz birden gúldenip ketpedik. Qurbandyqtar berip kelemiz. Dál osy jeltoqsanmen birdeı qandy oqıǵa «Jańa ózen» qaldy júrekte aýyr jara bop. Baıqońyrdan ushqan zymyrandar qazaq dalasyn ýlap jatyr. Bılik sebebin «anyqtaı almaı qoıǵan» júz myńdaǵan kıiktiń qyrǵyny qazaq úshin qasiret emeı nemene? Habar arnasynan kórsetiletin «Qazaqstanda» ómir súrgisi kelip, mádenıetten órkenıetten jyraq qalǵan qanshama aýyldar bar? Sýsyz, jaryqsyz, ınternetsiz qanshama aýyl úı bar?
Qaırat, Siz Almatyda týmasańyz da, alty jasyńyzdan Almatyda oqyp, erjettińiz. Álı myrza bolsa Almatyda týǵan asfálttiń balasy. Almatyny jaqsy bilesizder. Sheshilmeı jatqan qanshama máselesi bar: Kún saıyn kók tútinge kómetin kólik keptelisi; Baspanasyz júrgen, qańǵyryp júrgen, bazarda arba súırep qazaqtyń jastary; Jyl saıyn neshe on myńdaǵan túsik tastaıtyn qazaqtyń qyzdary; ajyrasyp ketip jatqan árbir úshinshi neke... Bul basqa qoǵamnyń, basqa ulttyń máselesi emes. Ózderińizdi basyna kóteretin qazaqtyń problemasy. Áleýmettik jelide sizderdi oqıtyn mıllıonnan astam oqyrmandaryńyz bar. Sizder áleýmettik jelini sol jastardy komersıalyq jarnama úshin, konsertke shaqyrý úshin qoldanǵannan basqa da paıdaǵa jarata alasyzdar. Syılasýǵa, yntymaqty bolýǵa, ishimdikten aýlaq bolýǵa, kitap oqýǵa, ımandy bolýǵa, eldi-jerdi súıýge shaqyra alasyzdar.
Qaırat, Siz «depýtat bolsam qazaq tilin damytam» degen edińiz. Núshany eki aýyz qazaqsha sóıletkenińizden qazaq tili damyp ketpeıdi ǵoı. Qazaq tilin depýtat bolmaı-aq ta damytýǵa bolady. 2008 jyly 25 aqpanda Almaty qalasy Respýblıka saraıynda «Tátti sezim» atty alǵashqy shyǵarmashylyq án keshin bergenińizden beri Siz ótkizgen konsertte zal tolmaı qalǵan emes. Qazaqtyń kez-kelgen bir myqty aqyny nemese qazaq máselesiniń qabyrǵasyn qaýsatyp júrgen jazýshysy shyǵarmashylyq kesh berem deı qalsa zal tolmaýy múmkin. Biraq, Sizdi tyńdaýǵa jurt keledi. Bul Sizdiń úlken kúshińiz.
Sizderdegi kúsh – ónerińiz emes, taǵyp alǵan medalyńyz emes, partıalyq bıletińiz emes, ár toıdan arqalap ketetin mıllıondaǵan teńgeńiz emes, qymbat kólikterińiz nemese analaryńyz emes. Ol halyqtyń, qazaqtyń sizderge degen mahabbaty. Sizder de soǵan laıyqty qyzmet isteńizder. Tyńdarmandaryńyzdy izdeniske, bilim alýǵa, kitap oqýǵa, eńbek etýge shaqyrsańyzdar eken. Maǵan el taǵdyryn sheship júrgen azamattar tasada qalǵandaı seziledi. Sóz sońynda, «Ózderińizdi alǵan orden-medaldaryńyzǵa laıyqpyn dep sanaısyzdar ma?» degen saýal tastaǵym keledi.
