Kaınoý (Kainoa) esimdi 5 jasar uldyń anasy Shanna Nıhaýs (Shanna Niehaus) osy sýretti ǵalamtorǵa sala otyryp jazǵany myńdaǵan adamnyń júregin eljiretti deıdi lovewhatmatters.com saıty.

«Dál osy mınýtta ne bolyp jatqanyn kórip otyrsyz ba? Keshe 5 jasar aýtızmmen aýyratyn meniń ulym Tornado esimdi ıtpen tanysty. Tornado aýtıst balalarǵa kómektesýge úıretilgen ıt. Biz Japonıada ómir súretin amerıkalyqtarmyz. Tornadomen kezdesýdi eki jyl boıy zaryǵa kúttik».

Myna fotoda anasy balasyna qarap otyr. Ol óz balasyn meıirlene qushaqtaı almaıdy, kıindire almaıdy, erkele almaıdy. Aýtızmge shaldyqqan bala ózine dos taba almaı qınalǵan. Sebebi balalarmen birge oınaı almaıdy, kúle almaıdy. Qanshama dárigerge aparyp kórse de alǵa jyljýdy baıqamaǵan anasy ulynyń ıtpen dostasqanyna, onymen únsiz tildeskenine baqytty.

Shannanyń aıtýy boıynsha, osy mınýt uzaq jyldarǵa sozylǵan kúreske tatıdy. «Men qansha lıtr kóz jasyn tókkenimdi aıtpaı aq qoıaıyn. Ulymnyń qınalǵany meniń janymdy jabyrqatatyn. Al, búgin qýanyshtan jylap otyrmyn. Ulymnyń endi syrlas dosy bar. Endi bári jaqsy bolatynyna senimdimin»