Búginde úlken qalalardyń kóshelerinen qaıyrshylardy jıi kóretin boldyq. Olardy kórgen saıyn mundaılar nege kóbeıip ketti dep kóńilimiz túsip qalatyny ras.
Keshegi aptada biz Shymkenttegi Qazybek bı kóshesiniń boıynda ótken-ketkenge qol jaıyp júrgen qarıany baıqadyq. Qorqyp qalsa kerek, bizdiń ózine qaraı júrgenimizdi baıqaǵan ol kisi qolyndaǵy ydysyn artyna jasyrdy. Qasyna barǵanymyzda bizdi ákimshilikten keldi dep oılasa kerek, nanǵa aqsha surap júrgenin aıtyp jylarman kúıge tústi.
«Jasym 66-da, áıelim de 60-tan asyp barady, – dedi ózin Beket Nurdınuly Nazarbaevpyn dep tanystyrǵan qarıa (sýrette). – Saryaǵashtyń týmalarymyz. Ekeýmizde de eshqandaı qujat joq bolǵandyqtan zeınetaqy ala almaı júrmiz. Eki ul, eki qyzym bar. Bir ulym qoı baǵady, ekinshisi araqty kóp iship, baýyrdan aıyryldy. Ár jerde jumys istep júredi. Qyzymnyń bireýi Badamda, ekinshisi eki balasymen qolymda. Olardyń bárine nan kerek.
Buryn Qyrǵy bazarda arba aıdap edim, keıin oǵan jaramaı qalǵandyqtan osylaı kóshege shyǵyp qaıyrshylyq jasaýǵa týra keldi. Kúnige 1000 – 2000 teńge tabamyn. Keıde sony da jany ashymaıtyn polısıa qyzmetkerleri tartyp alyp ketedi. Olar maǵan bulaı kóshege shyqpa deıdi, sonda ne isteımin, úıde jata bersek, ashtan ólemiz ǵoı. Ózimiz aıyna 10 myń teńgeden páter jaldap turamyz. Aqshany ýaqtyly bermesek páterden de qýyp shyǵady. Ákimshiliktiń qyzdary da kelip qaıyrshylyq jasama, ket deıdi. Biraq kómektesemin degendi aıtqan bireýi joq. Tym qurysa qujatymdy qalpyna keltirip berse zeınetaqy alyp otyrar edim. Pensıaǵa shyqqym keledi».
Beket qarıanyń áńgimesin tyńdap bolyp, qoshtasyp turǵanymyzda ol kisi bizge tańerteńnen beri eshteńe tatpaǵanyn aıtyp nanǵa aqsha tastap ketýimizdi ótindi. Qaltamyzdaǵy temir teńgelerdi alǵannan keıin ol sol jerdegi dúkenge qaraı ketip bara jatty.
...Jalpy, Qazaqstanda kóshede qol jaıǵandar bolmasyn desek, qaıyrshylarǵa emes, qaıyrshylyqqa qarsy kúres týraly zań qabyldaý kerek-aý. Áıtpese onsyz da nan tappaı júrgenderdi aıyppul salyp kóshege shyǵarmaı qoıamyz degen aqylǵa syımaıtyn sekildi.
Derekkóz: zamana.kz
Avtor: U.Támenov
