QR densaýlyq saqtaý jáne áleýmettik damý mınıstri Tamara Dúısenova Elbasy Nursultan Nazarbaevtyń zeınetaqy men bala týǵanda beriletin memlekettik járdemaqyny ulǵaıtý týraly tapsyrmasyna oraı túsinikteme berdi, dep habarlaıdy inform.kz

«Zeınetaqyny 20 paıyzǵa kóterý týraly tapsyrma berildi. Sóz  yntymaqty zeınetaqy jaıynda bolyp otyr. Qazir biz 1 qańtardan bastap 9 paıyzǵa kóteremiz. 1 shildeden taǵy da 11 paıyzǵa kóterilip, tolyqtaı alǵanda jylyna 20 paıyz bolady. Bala týýyna baılanysty beriletin járdemaqy boıynsha biz 1 qańtardan 7, al 1 shildeden 13 paıyzǵa kóterip, tolyqtaı alǵanda 20 paıyz bolady», - dedi mınıstr.

Sonymen qatar ol el búdjetinen bul maqsatqa qansha aqsha jumsalatyndyǵyn da naqty túsindirip berdi.

«Bizde zeınetkerler 2 mln. adam jáne shamamen 300-400 myń bala bar. Eger, barlyǵyn qosyp sanaıtyn bolsaq, shamamen 90 mlrd. teńge qajet. Qazir biz muny  Qarjy mınıstrligimen birge sanaýdamyz», - dep atap ótti.

Dúısenovanyń aıtýynsha, 2018 jyldyń 1 shildesinen bastap bazalyq zeınetaqy taǵaıyndaý eń tómen kúnkóris deńgeıi men jumys ótiline baılanysty taǵaıyndalatyndyǵyn eskerte ketti.

Esterińizge sala ketsek, el Táýelsizdiginiń 25 jyldyq mereıtoıyna arnalǵan saltanatty jıynda Elbasy Nursultan Nazarbaev el Úkimetine kelesi jyldan bastap zeınataqy kólemin 20 paıyzǵa arttyrýdy tapsyrǵan bolatyn.