"Ulanǵa" shyqqan oqýshynyń haty. Biraq, osy hat biraz kisilerge unamady. Sizder de "jazýshynyń densaýlyǵy, aýyrǵany oqyrmanǵa qyzyq emes" dep sókpegeısizder. Bul jerde bala júreginiń lúpili, shyn yqylasy jatyr. Ol óziniń súıikti jazýshysyna alǵysyn aıtyp, endi aýyrmasa eken degen balań tilegin bildirip otyr. Júrekti eljireter mundaı hatty gazetke qalaı jarıalamaısyń?! Tap qazirgi kezde qaı zıaly Dýlat aǵadaı qazaq úshin shyr-pyr bola alady? Oılanyp kórińizshi. Kóktemde kimniń kim ekenin kórdińizder ǵoı kópshiligińiz...
Búgin Dýlat aǵa Isabekovtyń týǵan kúni eken. Oqýshynyń osy hatyn aǵamyzǵa syılyq retinde berip jibermekpiz. Ózi "sovmınde" jatyr eken. "DÝLAT ATA, AÝYRMAŃYZSHY"... Bul barsha qazaq balalarynyń, "Ulandy" oqıtyn perishte kóńilderdiń tilegi" dep «Ulan» gazetiniń jýrnalısi Jadyra Narmahanova №43 mekteptiń 10-synyp oqýshysy Aqerke Sabyrqyzynyń Dýlat Isabekovke jazǵan jyly lebizin gazetke jarıalapty. Qamshy portaly sizdermen de bólisýdi jón kórdi. Bul dúnıede adamdar arasynda este qalatyn nárse bir-birine degen syılastyq pen jyly lebiz ǵana emes pe?!
«Jazǵy demalys jaqyndaǵan kezde-aq, qandaı kitap oqımyn?» degen oıda júrdim. Mektebimizde ádebı keshti jıi uıymdastyratyn mektep basshysy Ǵalıa apaıǵa, barsha ustazdar qaýymyna alǵysym sheksiz. Ustazdarym meniń oıymdy oqyp qoıǵandaı, «mektepke jazýshy Dýlat Isabekov keledi» degende qatty qýandym. Bos ýaqytymda jazýshynyń shyǵarmalaryn oqyp, tolǵandyrǵan suraqtarymdy qaǵazǵa túsirdim. Ásirese, «Gaýhartas» ómirge degen kózqarasymdy ózgertti. Qyzyǵa oqyǵanym sonshalyq, shyǵarmanyń sońyna deıin qalaı jetkenimdi bilmeı qaldym.
Aıtýly kúndi asyǵa kúttim. «Dýlat ata qalaı jazýshy boldy?», «Alǵashqy shyǵarmasy qandaı?», «Bala kúninde kim bolýdy armandady?» degen suraqtarymdy jazyp qoıdym. Biraq, qalamgerdi jaqynnan kórgende, qobaljydym ba, suraqtarymnyń jartysy umyt qaldy...Atamyzdyń aq batasyn alý úshin synyptastarym aıanyp qalmady, óleń aıtyp, myń burala bıledi. Ókinishtisi, Dýlat aǵamyz azdap syrqattanyp qalypty. Áńgimemiz uzaqqa sozylmady.
Qadirli Dýlat aǵa, sizge barsha mektep oqýshylary atynan alǵys aıtamyn. Bizdi balasynbaı, ýaqytyńyzdy bólip, sózimizdi tyńdaǵanyńyzǵa rahmet! Zor densaýlyq tileımin. Qazaq ádebıetiniń mártebesin asqaqtata berińiz!..»
"Qamshy" portalynyń ujymy da Dýlat Isabekovty týǵan kúnimen quttyqtaıdy! Aýyrmańyz, qalamyńyz ushtala bersin!
