Qazaqstan Respýblıkasynyń Táýelsizdiginiń 25 jyldyǵy aıasynda Ońtústik Qazaqstan oblysynyń ákimi J.Túımebaev óz salasynyń damýyna úles qosqan bilim, densaýlyq jáne mádenıet salalarynyń qyzmetkerlerine jalpy 110 adamǵa Túrkıa Respýblıkasynda tájirıbe almasý úshin joldama tapsyrǵan bolatyn.
2016 jylǵy 14-21 jeltoqsan aralyǵynda Túrkıa Respýblıkasy Ystambul qalasynda oblystyq medısına salasynyń 50 qyzmetkerine arnalǵan master-klasstar men oqytý semınarlary ótkizildi. Oqytý Ystambul qalasyndaǵy eń úzdik klınıkalary Okan ýnıversıteti aýrýhanasy, Yeditepe ýnıversıteti aýrýhanasy, Acıbadem aýrýhanasy bazalarynda júrgizildi. Semınarlar men master-klastardyń negizgi baǵyty – júrek pen qantamyr aýrýlary, onkologıalyq dertter, ana men balaǵa medısınalyq járdem kórsetýdiń biriktirilgen modelin engizýge baǵyttaldy. Onyń ishinde: jiti mıokard ınfarkty, jiti ınsýlt jáne jaraqat kezindegi medısınalyq kómek kórsetý jáne onkologıalyq aýrýlardy basqarýda, bosandyrý men balalar qyzmetinde medısınalyq kómek kórsetý qamtyldy.
Sondaı-aq atalǵan klınıkalardyń jumys menedjmentimen, dárigerlerdi daıyndaý ádisimen tanystyrý júrgizildi. Master-klastar barysynda oblystyq dárigerler kórsetilgen baǵyttar boıynsha otalar men manıpýlásıalardy jáne naýqastardy júrgizý tártibin úırendi.
Oqytýdyń qorytyndysy boıynsha barlyq mamandar arnaıy sertıfıkattarǵa ıe boldy.
Sonymen qatar, bilim jáne mádenıet salalarynyń qyzmetkerleri de halyqaralyq deńgeıde tájirıbe almasyp, asa paıdaly maǵlumat alyp qaıtty.
Onyń ishinde bilim qyzmetkerleri Ystambul men Ankara qalalarynyń mektepteri men bala baqsha jumystarymen tanysty.
