Búgin jańa jyl qarsańynda Shymkenttegi Q.Tólemetov kóshesinde 2 kópqabatty turǵyn úı paıdalanýǵa berildi. Saltanatty sharaǵa oblys ákimi Janseıit Túımebaev qatysyp, 96 otbasyǵa páter kiltin tabystady.
7 qabatty qos záýlim turǵyn úıdiń qurylysyn «Otaý Stroı» kompanıasy júrgizgen. Negizgi tapsyrys berýshi - «Qazaqstan Ipotekalyq Kompanıasy» ıpotekalyq uıymy.
«Jańa jyl qarsańynda qonystanǵaly otyrǵan baspanalaryńyz qutty bolsyn. Bul úılerdi memleket sizderge deldaldarsyz jáne nesıege barynsha tómen paıyzben usynyp otyr. Uzaq merzimdi jalǵa berilip otyrǵan baspanalardyń satyp alý quny da arzan. Memlekettiń osyndaı igi isteri aldaǵy ýaqytta da jalǵasyn tabatyn bolady»,- dedi oblys ákimi Janseıit Túımebaev.
Jańa páterge jaıǵasqandardyń basym kópshiligin kóp balaly jáne múgedek balalary bar otbasylar quraıdy. Sondaı-aq, jańa qonysqa qol jetkizgenderdiń arasynda jetim balalar men oralmandar, memlekettik qyzmetkerler men búdjettik mekeme qyzmetkerleri de bar. Mundaǵy turǵyn úılerdiń ár sharshy metri úshin jyldyq tólem 900 teńgeden aspaıdy. 20 jyl merzim aıaqtalǵanda páterler azamattardyń menshigine aınalady.
Jalpy, «Nurly Jol" memlekettik baǵdarlamasy men "Óńirlerdi damytýdyń 2020 jylǵa deıingi baǵdarlamasy" iske asa bastaǵannan-aq «Qazaqstan Ipotekalyq kompanıasy» Shymkent qalasynda 2541 páterdi satyp alǵan.
