Ońtústik Qazaqstan oblysynyń ákimi Janseıit Túımebaev Vengrıanyń Qazaqstan Respýblıkasyndaǵy tótenshe jáne ókiletti elshisi, doktor Andrash Baranı men Vengrıanyń Almaty qalasyndaǵy bas konsýly Ferensa Blaýmannamen kezdesti.
Qos tarapty kezdesý barysynda aýyl sharýashylyǵy, kólik-logıstıka salasynyń damý qarqyny jáne oblystyń ekonomıkalyq múmkindikteri týrasynda sóz qozǵaldy.
Aýyl sharýashylyǵy salasynda ósim ındıkatory basym. Jylyjaı baǵytyn damytýda oblys elimizde kóshbastap tur, respýblıkadaǵy jylyjaıdyń 91 paıyzy Ońtústikke tıesili. Vengrıa memleketiniń osy salada tájirıbesi mol ekendigi belgili. Sondyqtan óńirimizge ınvestısıa salý arqyly kóp jetistikke jetýge bolatynyn jetkizgen oblys basshysy eki el arasyndaǵy saýda-sattyqty arttyra otyryp, mádenı baılanysty da jandandyrý qajettigin alǵa tartty.
«Majarstandyq túrkitanýshy ǵalym, qoǵam qaıratkeri Ishtvan Qońyr Mandokı barlyq sanaly ǵumyryn majar jáne kúlli túrki halyqtarynyń qandas, týys jurttar ekendigin dáleldeýge arnaǵan ǵalym. Ol óz eńbekterinde túrki halyqtarynyń salt-dástúrin, mádenıetin, ulttyq dilin zerttep, tyń jańalyqtar ashqan. Mine, sol joldy jalǵastyra otyryp týystas elder retinde birlese otyryp mádenı is-sharalardy qolǵa alýymyz kerek. Máselen, keler jyldan bastap búkil túrkilerdiń astanasy atanǵan Túrkistan qalasynda josparlanǵan aýqymdy jobalarǵa majar halqy da úles qosýǵa nıetti» dedi oblys ákimi J.Túımebaev.
Elimizdiń barlyq qalalarynda bolǵan qonaqtar keler jyly Ońtústikte Vengrıanyń qurmetti konsýldyǵyn ashýdy josparlap otyr. Bul óz kezeginde, óńirdiń áleýeti, ósý qarqynyn zerdeleı kelgendegi sheshimi ekenin jetkizdi. Sondaı-aq bilim salasynda tájirıbe almasa otyryp majar jastarynyń Ońtústik Qazaqstandaǵy JOO bilim alýyna múmkindikter qarastyrylsa degen oılaryn da jetkizdi.
Aıta keteıik, eki el arasyndaǵy qarym qatynas jyl saıyn nyǵaıa túsýde. Vengrıa men Qazaqstan arasynda taýar aınalymy 2015 jyldyń alǵashqy 4 aıynda 29,3 mln AQSH dollaryn quraǵan. Qazaqstan ekportynyń negizgi komponenteri mıneraldy otyn, hımıalyq tyńaıtqysh, jabdyqtar men mehanızmder bolyp tabylady. Sondaı-aq, qos eldiń arasynda energetıkalyq, parlamentaralyq, mádenı-gýmanıtarlyq baılanys tyǵyz ornaǵan.
