Osy aptada Almatyda belgili dızaıner ári prodúser Jadyra Sahıeva men ánshi Merýert Túsipbaevanyń arasyndaǵy daý-damaıǵa qatysty sot otyrysy ótedi, dep habarlaıdy QazAqparat.

Eske salsaq, Jado esimimen tanymal J.Sahıeva telearnalardyń birinde M.Túsipbaevanyń stıline qatysty pikir bildiremin dep basy daýǵa qaldy.

Ánshi munyń esesin qaıtarý úshin óziniń İnstagram-daǵy paraqshasyna dızaınerge arnap jazba qaldyrdy. Túsipbaeva Jadonyń basyna túrban, ústine tor kózdi kóılek kıip túsken sýretin ornalastyryp, oǵan durys kıinýge ári aryqtaýǵa keńes bergen edi.

«Al túrban degendi etegi bar kıimmen kıý kerek, Jado! Djınsymen emes. Tor kózdi kóılekke mynaý ala oramal sáıkes kelmeıdi! Keıde mıdy jumys istetý qajet. Túsinemin, 10 synyptyq bilimmen alysqa barmaısyń. Onsyz da saǵan isteıtin is joq. Bizdiń Júrgenov atyndaǵy akademıaǵa tús. Onda Kamıla Asqatqyzy talǵamyńdy retke keltiredi. Semirip, álińdi bilmeı álek bolǵansha saýatyńdy ash! Eshqashan kesh emes. Bir ǵasyr ómir súrseń de, bir ǵasyr bilim al!»,-dep jazǵan edi ol.

Budan keıin Jado ómirde oqyp-toqyǵany baryn kórsetý úshin Túsipbaevany sotqa bergen. Dızaınerdiń İnstagram-daǵy resmı aýkkaýntynda Almatyda sot otyrysy ótetindigi jazyldy.

«Biz árbir aıtqan sózimiz úshin jaýaptymyz! Onyń arǵy kúni Almatyda dızaıner @jado.sakhi men ártis, ánshi M.Túsipbaeva arasynda sot otyrysy ótedi. Eske salsaq, Túsipbaeva dızaınerdi bilimi taıaz jáne «aryq emes» dep ataǵan edi...Bul árıne, qoǵamda shý shyǵarǵan edi», - dep jazylǵan onda.