26 jeltoqsanda Peterbor qalasynda Eýrazıalyq ekonomıkalyq odaq elderi basshylary bas qosty. Eýrazıalyq ekonomıkalyq odaqtyń beıresmı samıtine Belarýs prezıdenti Aleksandr Lýkashenko kelgen joq. Reseıde «qaraly kún» jarıalanǵan osynaý sátsiz kúnde Qyrǵyzstan prezıdenti Almazbek Atambaev samıt qorytyndysy boıynsha uıymnyń Kedendik kodeksi men saýda-sattyqty damytý málimdemesine qol qoıýdan bas tartty.
Reseılik buqaralyq aqparat quraldarynyń málimetine sensek, Belarýs basshysynyń samıtke kelmeýi odaqtyń jumysyna eshbir qatysy joq. Osy áreketpen ol resmı Kremlge óz talaptaryn oryndatýdy kózdeıdi, dep habarlady QazAqparat. Resmı aqparatqa sáıkes, Mınskiden Lýkashenkonyń samıtke kelmeýine qatysty túsinikteme kelmegen. Belarýs prezıdentiniń baspasóz hatshysy da eshteńe aıtpady. Al Reseı basshysynyń baspasóz hatshysy Dmıtrıı Peskovtyń sózine qaraǵanda, belarýs jaǵy Lýkashenkonyń kelmeıtinin eskertken. Degenmen, samıtke el prezıdenti qatysa almasa, premer-mınıstr, ıa bolmasa, basqa bir ýákiletti tulǵa kelýi tıis. Belarýs bolsa, eshkimdi jibermedi. «Samıtti uıymdastyrý jumystaryna jaqyn júrgen derekkózdiń málimetine sáıkes, Lýkashenkonyń samıtke kelmeýi Reseımen aradaǵy problemalarǵa baılanysty.
Bir jyldan beri Máskeý men Mınsk reseılik gazdy Belorýssıaǵa tasymaldaý sharttary boıynsha kelise almaı keledi. Búginde Belorýssıanyń «Gazprom» aldyndaǵy qaryzy shamamen 425 mln. dollardy («Kommersant» gazetiniń aqparaty boıynsha) quraıdy. Sondaı-aq belarýs jaǵy gazdyń baǵasyn 1 myń kýb metr úshin 132 dollardan 73 dollarǵa deıin tómendetýdi talap etip otyr. Eki eldiń prezıdentteri men premer-mınıstrleri atalǵan máseleni birneshe ret talqylady. Sońǵy ret Pýtın men Lýkashenko Máskeýde qarasha aıynda kezdesken edi. Alaıda bir kelisimge kele almady», - dep jazdy RBK. Budan bólek, Belorýssıa men Reseı arasynda sanksıalyq taýarlarǵa qatysty pikirtalas qyza tústi. RF Aýyl sharýashylyǵy qadaǵalaý qyzmetiniń basshysy Sergeı Dankverttiń aıtýynsha, Ýkraına arqyly keletin Eýropalyq odaq elderiniń taýrlaryna tyıym salý sharalaryn Belorýssıa óz múddesi úshin paıdalanyp otyr.
Aıta keteıik, Sankt-Peterbýrg qalasynda Eýrazıalyq ekonomıkalyq odaq pen Ujymdyq qaýipsizdik sharty uıymynyń beıresmı samıtteri ótken bolatyn. Buǵan deıin prezıdentter atalǵan uıymdardyń barlyq jıyndaryna tolyq quramda jınalyp turǵan. Alaıda Belarýs prezıdenti eki jıynǵa qatysqan joq. 2009 jyly UQSHU samıtine kelmegende Lýkashenko onymen «sút soǵysyna» óz qarsylyǵyn bildirgen. Sol kezde Reseı sút ónimderin ımporttaýǵa tyıym salǵan bolatyn. Al 2014 jyly Belarýs basshysy Reseı munaı-gazdyń baj salyǵy boıynsha jeńildik jasamaıynsha Eýrazıalyq ekonomıkalyq odaq týraly kelisimge qol qoımaıtynyn eskertken.
Eske sala keter bolsaq, Reseılik BAQ-qa suhbat bergen Lýkashenko «Musylmandar senderdi eshqashan keshirmeıdi. Nege Sırıaǵa tıise beresińder, ol úshin áli jaýap beretinderińdi bilesińder me?» - dep ashýly kúıde sóılegen edi.
Lýkashenkonyń Reseıge doq kórsetýi bir bul emes. Belarýs basshy Reseıdiń qyrymdy anneksıalap alyp, óz topyraǵy sanaýyna baılanysty da ««Euronews» telearnasyna bergen suhbatynda:
«Qazir kóptegen adamdar Qyrym Ýkraınaǵa qaramaýy tıis edi, Qyrym – RF-nyń terıtorıasy dep júr. Bul durys emes. Olaı bolsa, Batý hannyń kezeńine oralaıyqshy… onda Qazaqstan men Mońǵolıaǵa jáne basqalarǵa Reseı terıtorıasyn qaıtaryp berý kerek bolady», - degen edi.
