Joıqyn jarylystan soń jalma-jan qazandyqtardy túgendeı bastaǵan sheneýnikter taǵy osynshama turǵyn úıdiń jylý júıesi jertólesinde dep shyndyǵyn aıtty dep habarlaıdy ktk.kz. Al jylyna jeti aı tynbaı janatyn qazandyqtan qaýip úlken. Buǵan deıin eshkimniń qaperine de kirip-shyqpaǵan peshter 9 adamnyń óliminen keıin jappaı tekserile bastady. Tipti jergilikti bılik kinálini taýyp ta qoıǵan sıaqty. Bar jaýapkershilik artylǵan ot jaǵýshy qazir tergeýshiler aldynda jaýap berýde. Qys tússe bolǵany óz qotyryn ózi qasyp úırengen jurt bolsa, úılerde qalýǵa úreılenip otyr. 

Bul túni búkil shahandyqtar Jańa jyldy toılaýdy kilt toqtatqan. Áli de túkke túsinbegen jurt tórtinshi úıde turatyn týystaryn úıindiniń arasynan izdeýmen boldy.Qutqarý jumystaryna Qaraǵandy oblysynyń búkil kúsh qurylymy jumyldyrylǵan. Odan bólek taǵy 300-ge tarta erikti úıindini arshyp júr.

-Jantúrshigerlik jarylystyń sebebi tek bir táýlikten soń belgili boldy. Sóıtse, jertólede ornalasqan derbes jylý qazandyǵy qysymǵa shydamaı jarylǵan eken. Saldarynan kópqabatty úıdiń bir bóligi jermen-jeksen boldy.  

Dese de, 9 adamnyń qaza tapqanyna qaramastan, bul jarylys úshin naǵyz kinálilerdiń tabylmaıtyn túri bar. Óıtkeni, sý men jylýǵa jaýapty komýnaldyq qyzmettiń baryna qaramastan, qaraǵandylyq sheneýnikter bolǵan oqıǵaǵa turǵyndardyń tek ózderi ǵana jaýapty dep otyr.     

Serjan Aımaqov, Shahtınsk qalasynyń ákimi:

-60 páter bári de jekemenshik. Ózderi sheshedi. Keıbir úıler peshtermen otyr. Keıbireýler syrtyna qazandyq salyp aldy. Keıbir úıler ózderine jertólege qazandyq saldy. Jekemenshik bolǵannan keıin qaýipsizdikke ózderi jaýapty.

Sóıtse, tek bul úı ǵana emes, búkil Shahan kenti jylýǵa jarymaǵan eken. Qysy yzǵarly óńirde turǵyndar óz qotyryn ózi qasyp úırengen. Biri kómir jaǵyp jylynsa, endi biri osylaı úıiniń astynan pesh turǵyzyp alǵan eken. Al sheneýnikter on jyl buryn ortalyqtandyrylǵan jylytý júıesin salmaq bolǵanyn aıtyp aqtalýda. Alaıda oǵan úkimettegiler ruqsat bermepti.  

Serjan Aımaqov, Shahtınsk qalasynyń ákimi

- Búdjettik usynystarymyzdy bárin bergen bolatynbyz. Ony oblystyq komýnaldyq basqarmasy bar,  mınıstrligi bar bári  biledi. Endi qıyn jyldary qarajat bólingen joq.

Al 5 qabatty úıdiń saý tamtyǵyn qaldyrmaǵan jylytý qazandyǵy áli 18 úıde bar. Bári de jertólede ornalasqan. Sonyń kesirinen jerlesterin jer qoınaýyna tapsyrǵan jurt endi ózderin qoıarǵa jer tappaı otyr.  

Lıdıa Prımak, Shahan kentiniń turǵyny:

-Al eger bizdiń de qazandyq jarylyp ketse she?   Turǵyndar túgeldeı derlik jylýǵa jarymaǵan soń gaz balon qosyp otyr. Bir kúni bizdiń de shatyrymyz tóbemizge tússe qaıtpekpiz? Ólim-jitim kóbeımeı turǵanda máseleni sheship bersin!

Lıdıa Prımaktyń aıtýynsha, jarylys tek jylytý qazandyǵynan bolmaǵan. Oǵan gaz balondardyń da áseri bar. Óıtkeni, jylýǵa jarymaǵan shahandyqtar tek propan tutynady eken. Al kógildir otyn qosylmaǵandyqtan, bıliktegiler de oǵan kóz juma qaraǵan. Esesine, toǵyz adamnyń ómirin jalmaǵan jarylys úshin qazandyqtyń kútýshisi tergelip jatyr.