Gúlsara Shalqar — 1987 jyly qazan aıynda dúnıege kelgen. Taraz memlekettik pedagogıkalyq ınstıtýtyn tamamdaǵan. Búginde Astana qalasynda turady.

Ult 
(qyrǵyz eliniń jigitine arnalǵan aq óleń)

…jaqsy qyzdy jar etkińiz keledi. 
Elińizge kelin bolman, sebebi: 
Tom-tarıhty aqtarǵanda bolashaq 
Qazaq bolyp qalý kerek deregim. 
Bastarynda bolǵannan soń bostandyq, 
Qanshama qyz «ózge» jastyq jastandy. 
El bolmaıtyn «jıenderdi» kóbeıtip, 
Qazaǵyma jasamaımyn qastandyq … 
Zor bilekti batyr týsam, qaıtemin? 
Jar astynda jasyrynǵan jaý bolar. 
Dúr júrekti hakim týsam, qaıtemin? 
El arasyn alshaqtatar daý bolar. 
Óte bilgir ákim týsam, qaıtemin? 
Qarashadan dara shyǵyp han bolar. 
Ótkir tildi aqyn týsam, qaıtemin? 
Tamyryma tartyp tekti jan bolar. 
Jez tańdaıly ánshi týsam, qaıtemin? 
Óner, shirkin, ózge ultqa joldanar. 
Sheberlengen kúıshi týsam, qaıtemin? 
Satqyndyqtyń soraqysy sol bolar. 
Urpaǵymdy súıgenmen, 
ultym úshin kúıgende, 
belgili ǵoı juldyzymnyń janbasy. 
Áıel-erdiń qabyrǵasy bilgenge, 
Bir qazaǵym «qabyrǵasyz» qalmasyn. 
Urdyń qyzy kútip júr-aý sizdi de 
«qabyrǵańyz» bolǵasyn. 
Dostyq týyn jelbiretsek… 
Dostyq sózi kıeli! 
(adal dos dep sizge basty ıemin). 
…ózge ultta alynbaǵan óshim joq, 
Óz ultymdy «ózgesheleý» súıemin. 
Sondyqtan da, qazaq bolsyn kúıeýim!