Ońtústik Koreıanyń prokýratýrasy  memlekettiń eń baı bıznesmenderiniń biri, Samsung Electronics kompanıasynyń vıse-tóraǵasy Lı Djeóndy qamaýǵa alýǵa order beripti dep habarlaıdy bbc.com. Eger de sot orderdi maquldasa, Lı Djeón sársenbi kúni qamaýǵa alynýy múmkin.

Bıznesmen Koreıadaǵy eń úlken korrýpsıalyq skandalǵa qatysy bar bolyp shyqty. Esterińizge sala keteıik, memleket prezıdenti Pak Kyn Heniń qurbysy Chhve Sýn Sıl korrýpsıaǵa qatysy bar jáne qyzmettik jaǵdaıyn asyra paıdalanǵan degen aıyppen ustalǵan bolatyn. Al, Pak Kyn Hege keletin bolsaq, oǵan ázirge ımpıchment jarıalandy.

Parlamenttiń sheshimin Konstıtýsıalyq sot 180 kún ishinde qarastyryp, bekitýi tıis. Eldiń tizgini premer-mınıstrge tapsyryldy.

Tergeý isiniń málimetine sáıkes, Chhve Sýn Sıl ózine qatysty eki úkimettik emes qoryna qaıyrymdylyq jasaýǵa iri bıznes ókilderin májbúrlegen. Sondaı «donorlardyń» biri Samsung konserni. Kompanıa Chhve Sýn Sıldyń qolyna onyń qyzynyń Germanıada atqa salt minip júrýge úırenýi úshin birneshe mıllıon dollar tabystaǵan.

Ótken beısenbide Lı Djeón jaýap alýǵa prokýratýraǵa shaqyrylǵan bolatyn. Tergeý 22 saǵatqa sozylypty.  Tergeý isiniń oıynsha, Lı Djeón tutas kompanıanyń ıesi bolmasa da memleket basshysy tarapynan jasalatyn qorǵanshylyqtyń pen qamqorlyqtyń rızashylyǵy retinde Chhve Sýn Sılge qarajat aýdarýǵa sheshim qabyldap otyrǵan. Lı Djeón osyǵan deıin parlamenttik tyńdaý barysynda úkimettik emes uıymdarǵa jasalynǵan qaıyrymdylyq aýdarymdardyń barlyǵy arampıǵyl maqsat kózdemegenin aıtty.

Ońtústik Koreıa BAQ-y Lı Djeóndy  Samsung-tyń murageri dep ataıdy. Sebebi korporasıanyń resmı tóraǵasy onyń týǵan ákesi  Lı Gonhı. Lı Gonhı densaýlyǵyna baılanysty bızneska aralasýyn qoıyp, jurt nazaryna shyǵýdan qalǵan.

Aýdarǵan: Jazıra Baıdaly