Almaty-2 vokzalynda jolaýshylar dóner, shaýyrma jasap, satatyn  dúńgirshekti uıaly telefonǵa túsirip, ǵalamtorǵa jarıalady.  Onda turǵan ne bar dersizder. Alaıda vıdeodan tyshqannyń adamdardan qoryqpaı, qymsynbaı emin-erkin dóner men shaýyrmaǵa arnalǵan etti jep jatqanyn kórýge bolady. Ózine tónip turǵan adamdardan qoryqpastan tamaqtaný prosesin jalǵastyryp jatqanyna qaraǵanda, tyshqan vokzaldaǵy dóner satatyn oryndy óziniń turaqty asqanasyna aınaldyryp alǵan sekildi.

Bul jaǵdaıdan beıhabar tutynýshylar kórsetilgen jerden dóner men shaýyrma satyp alyp jeıdi. Onyń aldynda ǵana ol etten tyshqannyń da dám tatqanyn bilmeıdi. Ol tyshqannyń qaıda, qalaı júrgeni, qandaı jerlermen júrip ótkeni, buǵan deıin ne jegeni bir Allaǵa ǵana aıan. Tyshqandardyń aýrý tasymaldaıtynyn, aýrýdy qozdyratynyn da eskersek halyq kóp júretin temir jol beketi sekildi jerlerde osyndaı dámhana, dúńgirshekterdiń bolýy óte qaýipti.

Buǵan deıin de dónerden ýlanǵan jaǵdaılar boldy. Osydan biraz aı buryn kishkentaı qyzdyń dóner jep qaıtys boldy degen habar tarady. Tekseris barysynda búldirshinniń ólimine dónerdiń qatysy bolmaı shyqty. Degenmen de «Saqtyqta qorlyq joq» demekshi, mamandar eshqanaı sanıtarly normalarǵa jaýap bermeıdi degen kúdik týdyrǵan jerlerden, kóshede beti ashyq túrde satylyp jatqan taǵamdardy satyp almaýǵa keńes beredi.