Úkimettiń búgingi otyrysynda sóz alǵan «Qazaq xandyǵy. Almas qylysh» fılminiń rejıseri Rústem Ábdirash atalǵan kınotýyndyny túsirý kezindegi qıynshylyqtar týraly aıtyp berdi, dep xabarlaıdy QazAqparat.

«Tarıxı fılmderdi túsirgende qarý-jaraq jetispeı jatady, oq jetispeı jatady. Sonyń bári aınalyp kelgende qarajatqa tireledi. Biraq el aǵalarynyń arqasynda osy fılmdi bitirip, uıalmaıtyndaı etip jasap shyqtyq dep oılaımyn. Reti kelgesin aıtyp qoıaıyn, sol kezdegi Qorǵanys mınıstri Imanǵalı Nurǵalıulyna myń da bir raqmet. Osy jobaǵa kóp kómegin tıgizdi. Qapshaǵaıda túsirý tobynyń jatatyn ornyn berip, «egerskıı polk» jiberdi, at jaǵynan úlken kómek boldy. Sondaı-aq Almaty ákimi Baýyrjan Baıbek te ózi kelip, kásipkerlerdi taýyp, fılmniń aıaǵyna deıin túsirilýine qolǵabys jasady. Sóıtip, el aǵalary arqasynda osy úlken jobany aıaqtap shyqtyq», - dedi Ábdirash.

Onyń aıtýynsha, búginde xalyq tarapynan «Qazaq xandyǵy. Almas qylysh» fılmine oń baǵa berip jatqandar kóp. Alaıda syn aıtatyndar da bar.

«Endi, syn aıtpasa, bizdiń qazaq qazaq bola ma? Kezinde «Qyz Jibek» shyqqanda da biraz syn aıtyldy. Biraq báribir ol óz ornyn tapty. Bizdiń jobamyz da óz ornyn tabady degen oıdamyz. Búginde elden suraý túsip jatyr. Bıyl fılmniń jalǵasyn túsiretin oıymyz bar. Sondyqtan sizder, el aǵalary qoldap, osy joly durys búdjet berińizdershi. Óıtkeni qınalyp jumys isteısin. Aıaǵyńa tartsań, basqa jetpeıdi. Basyńa tartsań, aıaqqa jetpeıdi. Endi, bul ózimniń ákem týraly fılm emes. Ol - búkil xalqymyzdyń tarıxy. Osy jerde otyrǵan barlyq azamattardyń tarıxy. Sondyqtan bul jobany jalǵastyryp, kelesi jyly pash etsek, durys bolar edi», - dep atap kórsetti rejıser.