2017 jyldyń 25 qańtarynda Astana qalasynda 2017 jylǵy 28-shi Dúnıejúzilik qysqy ýnıversıadanyń alǵashqy alaýy tutatylady. Odan keıingi bes kún boıy respýblıkamyzdyń árbir oblys ortalyǵynda Alaýdy tutatýǵa arnalǵan óz saltanaty ótedi.
Elordadaǵy estafeta eki kezeńge bólingen. Alaý kóterýshiler 3,5 saǵatta qalanyń ortalyq kósheleri boıymen júgirip ótedi. Birinshi kezeń «Nazarbaev Ýnıversıtetinen» bastalyp, «Báıterek» monýmentine deıingi aýmaqty qamtıdy. Ekinshi kezeń «Báıterek» monýmentinen bastalyp, oń jaq jaǵalaýdaǵy qala ákimdiginde óz máresine jetedi. Estafetanyń jalpy uzaqtyǵy 12 shaqyrymdy quramaq. Alaýdy barlyǵy 60 adam kóteredi, olardyń arasynda belgili sportshylar jáne Astananyń qoǵamdyq qaıratkerleri bar.
Alaý kóterýshi qurmetine ıe bolǵan tulǵalardyń biri – bokstan Qazaqstan Respýblıkasynyń eńbek sińirgen sport sheberi, 2013 jylǵy álem chempıony, 2014 jylǵy Azıa oıyndarynyń chempıony, 2015 jylǵy álem chempıonatynyń kúmis júldegeri, Rıo-de-Janeırodaǵy 31-shi Jazǵy olımpıada oıyndarynyń chempıony Danıar Eleýsinov.
Sondaı-aq, bokstan Qazaqstan Respýblıkasynyń sport sheberi, 2009 jylǵy Azıa chempıony, «Astana Arlandary» quramynda 2015 jylǵy klýbtar arasyndaǵy álem chempıony, Rıo-de-Janeırodaǵy 31-shi Jazǵy olımpıada oıyndarynyń kúmis júldegeri Vasılıı Levıt elorda kósheleri boıymen Estafeta alaýyn kóterip ótedi.
Sonymen qatar, gir kóterý sportynyń sheberi, 2014 jylǵy Álem kýbogy kezeńiniń kúmis júldegeri, 2013 jylǵy Álem chempıonatynyń qola júldegeri, 2012 jylǵy jasóspirimder arasyndaǵy Eýropa chempıony, 2010-2014 jyldar aralyǵyndaǵy QR-nyń bes dúrkin chempıony, 2015 jylǵy Álem chempıonatynyń kúmis júldegeri Álibek Naýryzbaıuly alaý kóterýshi qurmetine ıe boldy.
2016 jylǵy Ábý-Dabıdegi jıý-jıtsýdan álem chempıony, «Arlan Grip Selection» halyqaralyq jarysynyń chempıony, QR-nyń brazılıalyq jıý-jıtsýdan chempıony Móldir Mekenbaeva da 25 qańtarda alaý estafetasyna qatyspaq. Qazir birneshe sport túrlerimen belsendi túrde shuǵyldanyp júrgen Móldir QR-nyń ne-vazadan chempıony (djıý-djıýtsýdyń bir salasy, onda basty kóńil qarsylasty jerde kúresýge tartýǵa bólinedi), Astana qalasynyń ne-vazadan chempıony, grepplıng boıynsha túrli jarystardyń chempıony jáne júldegeri bolyp tabylady.
28-shi Dúnıejúzilik qysqy ýnıversıadanyń alaý estafetasyna sportshylarmen qatar, qoǵamdyq qaıratkerler, bilim salasynyń belsendi úzdikteri qatysady. Olardyń qatarynda shahmattan 18 jasqa deıingi álem chempıony, áıelder arasyndaǵy Ortalyq jáne Orta Azıa chempıony, 12 jasqa deıingi jáne 15 jasqa deıingi álem vıse-chempıony, QR-nyń birneshe dúrkin jáne absolúttik chempıony, belgili qazaqstandyq shahmatshy Dınara Sádýaqasova da bar.
Qazaqstandyq hokeıshi, QHL-da oıyn kórsetetin Astana «Barysynyń» qorǵaýshysy, 2015 jylǵy álem chempıony, 2012-2014 jyldar aralyǵyndaǵy chempıonattardyń júldegeri Mádıar Ybyraıymbekov alaýdy elordadan Ýnıversıadanyń ashylý saltanatyna deıin jetkizetin alaý kóterýshi retinde tańdap alyndy.
Jalpy alǵanda Ýnıversıada alaýy 22 500-den astam shaqyrymǵa sozylǵan joldy ótip, onyń 200 shaqyrymyn alaý kóterýshiler júgirip ótpek. Uıymdastyrýshylar jobany 16 derbes bólikke bólip, ár oblysqa is-sharany ózderine beıimdeýge múmkindik berdi. Osylaısha Alaý estafetasy Ýnıversıada geografıasyn bir qaladan tutastaı búkil el aýqymyna deıin keńeıtpek.
