Barsha jurtshylyqqa tanymal qazaq ánshisi Baǵdat Sámedınova jeke ómirinde, otbasylyq jaǵdaıynda úlken qıyndyqtarǵa tap bolǵan qyzynyń taǵdyry týraly «Qazaqstan» arnasynyń «Áıel baqyty» atty baǵdarlamada baıandap berdi.

«Meniń úlken qyzym Merýert kishkene tuıyqtaý bolyp ósti. Búgingi tańda ol da bala tárbıelep, qyz asyrap otyr. Meniń múmkin jibergen qatelikterim de bar shyǵar. Merýerttiń kúıeýi namaz oqıtyn, biraq bir jaman aǵymdardyń sońynda ketkenin baıqamappyz.  Sóıtip ol qyzyma qysym kórsetip, paranja jamyl dep kúshtepti. Turmystary óte nashar boldy. Qazir birge turmaıdy. Bir kúni balasy syrqattanyp qalyp edi, men oǵan qansha ret balany dárigerge alyp bar desem de, meniń kóńilimdi qımaıdy ma, maǵan «ıá» deıdi de, biraq ózi aparmaı júre bergen», - dep aǵynan jaryldy QR ánshisi.

«Sodan ózim alyp baramyn dep úıine bardym, kúıeýbalam menimen amandasqan da joq. Merýert ózi áreń degende shyqty, qoryqqanyna ba... Dárigerge baryp kórsetip bolǵan soń, bizdiń úıge keldik.

Úıińe bar desem «Barmaımyn, men dárigerge apardym, endi ol meni taıaqtaıdy», – deıdi. Sóıtsem istemegeni qalmaǵan, qatty uryp-soqqan. «Qulaǵym aýyryp júr», - deıdi, qatty soqqydan qulaǵynyń jarǵaǵy jarylyp ketipti. Bir kúni kúıeýi kelip, qoımaı keshirim surap, alyp ketti. Sheshesimen kelipti, ápkesi bar - barlyǵy Qapshaǵaıǵa baryp bireýdiń úıinde turdy.

Sol jaqa barǵannan soń taǵy bastaldy. Myltyqpen, pyshaqpen qorqytatyn. Bir kúni qatty urǵan,pyshaqty suǵyp ala jazdaǵanda áreń qashyp qutylyp, bir orystyń úıine baryp tyǵylypty. Sodan qyzym «Mama men boldym, shydamym taýsyldy, kelip alyp ket meni» –  dedi. Sonan soń aıyrylsty ekeýi», - dep qyzynyń qorlyqpen ótkizgen azapty kúnderin aıtyp berdi.