Dáret alý bólmesindegi ilgishke kúrtkesin qaldyryp ketken almatylyqtyń 110 myń teńgesi men Samsung Galaxy s6 Edge uıaly telefony urlanǵan. Almatylyq jigit bul týraly Tengrinews.kz tilshisine bergen suhbatynda aıtyp berdi. Onyń aıtýynsha, bul oqıǵa 2017 jyldyń 15 qańtarynda Fedorov pen Goncharov kósheleriniń qıylysynda ornalasqan Ál-Mádına meshitinde bolǵan.

Almatylyqtyń aıtýynsha, ol kúrtkesin ilip, namaz oqýdyń aldynda dáret alý bólmesine kirgen. Sodan keıin vıdeodaǵy kadrlarǵa qaraǵanda, belgisiz er adam kúrtkeden ámıandy alyp, onda jatqan telefondy, aqshany jáne kýálikti alyp shyqqan. "Dáret alýǵa shamamen 5-10 mınýt ketti. Sodan bólmeden shyǵyp, kúrtkemdi kıdim - kúrtkem jep-jeńil. Sóıtsem kúrtkemde telefon da, ámıan da joq", - deıdi er adam.

Sondaı-aq, ol joǵalǵan qarajattyń taýar alýǵa qajet bolǵanyn aıtty. Er adam dúkende jumys isteıdi eken. Osy oqıǵadan keıin ol Jetisý aýdandyq İİB-ne aryz jazǵan. "Áli habar kelgen joq", - deıdi er adam. Onyń aıtýynsha, kýálik keıinnen meshittegi aıaqkıimderge arnalǵan jáshikten "tabylǵan". Qujattyń tabylǵany týraly er adamǵa meshit ımamy habarlapty. "Qaıtaryp bereıin dep sheshken ǵoı", - deıdi er adam.

Óz kezeginde Almaty qalalyq İİD resmı ókili Saltanat Ázirbek 2017 jyldyń 15 qańtarynda Jetisý aýdandyq İİB-ne túsken aryz boıynsha sotqa QR Qylmystyq kodeksiniń 188-babynyń 1-bóligi boıynsha ("Urlyq") sotqa deıingi tergeý jumystarynyń bastalǵanyn aıtty. "Belgisiz bireýler ishinde aqsha men uıaly telefon bolǵan ámıandy urlap ketken. Osy qylmysty ashý maqsatynda jedel-tergeý toby quryldy", - dedi İİD ókilderi. Osyǵan baılanysty polısıa ókilderi azamattardan óz múlikterine ıe bolyp, qoǵamdyq jerlerde qaldyryp ketpeýlerin suraıdy.