Qyrǵyz rejıseri Omýrzak Tolobekov Qazaqstan Prezıdenti týraly «Álemdik Nazarbaev» atty derekti fılm túsirdi. Bul týraly ol baspasóz máslıhatynda málim etti, dep habarlaıdy knews.kg. Fılm qyrǵyz jáne orys tilderinde júrgiziledi.

Avtorlardyń aıtýynsha, Nazarbaev jas kezinde birneshe jyl Qyrǵyzstanda júrgen, fılm dál osy kezeńge arnalǵan.  «Biz Nazarbaevpen tanys bolǵan, dos bolǵan birneshe adamdy taptyq. Olar bizge qyzyqty suhbat berdi. Nazarbaev Qyrǵyzstanda ósken, ol bizdiń tilimizdi, halqymyzdy, mádenıetimizdi jaqsy biledi. Qazir Qazaqstanda 300 myńǵa jýyq qyrǵyzstandyq mıgrant júr, bul úshin oǵan alǵysymyzdy bildiremiz», - dedi Omýrzak Tolobekov.

Fılmdi qurastyrýshylardyń aıtýynsha, Qazaqstan Prezıdenti óziniń jastyq shaǵyn eske salatyn fılmdi kórip úlgerdi. Sondaı-aq, prodúserler jobany óz qarajattaryna túsirgenin, fılm búdjeti 20 myń dollardy quraǵanyn atap ótti. Fılm 55 mınýtqa sozylady. Kartınany bıylǵy 17 aqpannan bastap, Qyrǵyzstan kınoteatrlarynan tamashalaýǵa bolady, dep jazady kabar.kg. «Fılm búdjeti 20 myń dollardy quraıdy. Ony ózimiz qarjylandyrdyq jáne baýyrlas qazaqtardan kıno túsirý úshin aqsha suraǵan joqpyz. Jalǵyz suraǵanymyz - fılmdi qazaqstandyq telearnalarda kórsetý ǵana», - dedi O.Tolobekov.