Qara baýyr qasqaldaq, qaıda ushtyń pyr-pyrlap?
Sazyń qaldy sábıdiń eńbegindeı bylqyldap.
Qara baýyr qasqaldaq, keri qaıt,
Sırep qalǵan toǵaıǵa «qamyqpa» dep kóńil aıt ,- dep shyrqalǵan ánniń avtory, sazger İlesbek Amanovtyń kelmestiń kemesine minip ketkeni jaıyndaǵy sýyt habardy, keshe Tobanıaz baýyrym telefon arqyly jetkizgen edi. 
«Jeltoqsan86-ǵa» qatysty shyqqan bul án talaı jandardyń kóńilinen shyqty, ásirese, túrmeler men zonalardan qaıtyp kelgen bizderge erekshe ystyq edi. Qaıyrmasyndaǵy «qańǵyp kelgen shúregeıi» men kóli" tyrnaǵy batqan, qylyshynan qan tamǵan qyzyl ımperıa ókilderine almastyryp aıtqan, basqasy bolmasa da, aıyzdaryn bir qandyra, naqyshyna sala oryndaýǵa tyrysyp baqqan talaı ánshilerge qosyla shyrqap qoıa beretinbiz. Toıshyl qazaqtyń úlkendi-kishili toılary men bas qosýlarynda shyrqalyp júrgen osy ánniń avtory - İlesbek aǵamyzben tanysýdyń joly byltyr saılaý naýqany kezinde týǵan edi.

Shymkent qalasynyń jeltoqsandyq azamattary - Sábıt, Batyrhan, Tobanıazdar kútip alyp, keıinnen, Almaty qalasynda Gúlmıra Toıboldınanyń dastarhanyna jınalǵan jeltoqsandyqtardyń bas qosýyndaǵy otyrysta óziniń oryndaýynda tyńdaý baqytyna ıe bolǵan edik. Keremet bas qosýda talaı ánder aıtylyp, baıan pernetaqtalarynda oınaǵan sheberdiń saýsaqtary men qubyla shyqqan ásem daýysy barshamyzdy baýrap alyp, qaıyrmasyna kelgende 
...Uıa qalsa ıesiz,
Aıdyn úshin sol qaıǵy.
Qańǵyp kelgen shúregeı,
Kólge pana bolmaıdy, - dep qosyla jónelgenimizdi kórgende, avtordyń júrekten shyqqan áni júrekterge jetkenin kórip, ózi de bir erekshe kúıge engenin syrt kózden jasyrý múmkin emes edi. Átteń-aı, sol bas qosý sońǵy bolaryn kim bilgen?!... 
Dál osy ýaqytta Shymkentten shyqqan qaraly kósh Saryaǵashqa jaqyndapty. Sazgerdi áke-sheshesi máńgi meken tapqan Maqtaaralǵa qoıatyn kórinedi.
İlesbek kózden ketse de, kóńilden ketpeıtin áýeni ilesip, Jeltoqsannyń rýhy kóterip bara jatqan bolar?!...
Qosh bol, baýyrym.
Jatqan jeriń jannattan, topyraǵyń torqa bolsyn!

Qurmanǵazy Rahmetov "Naǵyz Jeltoqsan" QQ prezıdenti, Astana