Uzynaǵashta Qastandyqpen óltirilgen úsh azamattyń (Jarqynbek Doldanuly, Muhıat Zarlyhanuly, Qadylbek Álemqanuly) biri Qadylbektiń qyzy Perızattyń mezgilsiz ómirden ozǵan ákesine arnaǵan saǵynysh óleńin jarıalaýdy jón kórdik.

Jyp jyly júziń jadymda meniń,
Juldyzdaı sóndiń jalyndap ediń.
Ákeshim saǵan án jazdym búgin
Sebebi qatty saǵynǵan edim...

Saǵynyp qaldym óktem únińdi,
Saǵynysh monshaq ókpeme ilindi.
Qol bulǵap maǵan qoshtasyp kettiń,
Qalaǵan edim ketpegenińdi.

Óziń kıgizip ediń tar shulyǵymdy,
Qaraǵanyńda bar syr uǵyldy.
Óziń ósirgen  kimge qaldyrdyń,
Búrshigin atqan tal shybyǵyńdy.

Alysta bolsam asyǵatynmyn,
Erkelep kelip asylatynmyn.
Jaman tús kórip   jaǵdaıym qashsa,
Seni qushaqtap basylatynmyn.

Jalǵyz qaldyryp gúldeı órkendi,
Muń berdiń maǵan bilmeı kólemdi.
Qoshtasyp turyp  kelmeske kettiń,
Qalaı kónemin bilmeımin endi.

Saǵyndym áke beıneńdi seniń,
Joǵalad menen keıde endi senim.
Tylsym tústerge qorǵan bolatyn,
Qushaqtap jatam jeıdeńdi seniń.

Qaıǵy-muń meni janshylap  jatyr,
Ókpeli keýdem án surap jatyr.
Qarashy mine kógershinińniń,
Qanaty synyp qansyrap jatyr.

Dep júrgen edim baqyt tabamyn,
Taǵdyr uqtyrdy ýaqyt talabyn.
Qos qanatymnyń biri qıylyp,
Teńizge qulap batyp baramyn.

Jalyny sóndi janymnyń,
Asqary qulap baǵymnyń.
Estımisiń sen meni?!
Saǵyndym áke SAǴYNDYM!

Qadylbek Perızat