Kámelettik jasqa tolyp balalar úıinen ketken kúnim áli esimde... Keterde oıymda tek bir ǵana nárse boldy... Endi qaıda baramyn? ... Kimge baramyn? Meni kútip otyrǵan eshkimniń bolmaǵany únemi janyma batatyn. Anam balalar úıine tastap ketkende eshteńe túsinbegen ekenmin. Eń ókinishtisi anamnyń júzin durys jattaı da almappyn. Nebári segiz jasymda tastandy atanǵan men bolyp jatqan jaıdyń mánin birden túsine qoımappyn. Esimde qalǵany tek anamnyń jaǵdaıymyzdy durystap alǵan soń meni alyp ketem degeni ǵana. Sodan beri birtalaı jyl ótti. Anam kelmedi... árıne, saǵynamyn. Anamdy jazǵyrýǵa tipti qaqym joq dep jazady massaget.kz.

Balalar úıinen qujattarymdy alyp dalaǵa shyqqanda qaı baǵytta júrerimdi bilmeı biraz turǵan shyǵarmyn. Sodan ómir súrý kerek dep sheshtim. Men kóshede otyryp qaıyr suraı almaıtynymdy áý bastan sezgenmin. Olaı etýdi tipti oılaǵan emespin. Oqý oqyp, bilim alǵym keldi. Tańdaýym ál Farabı atyndaǵy QazUÝdyń jýrnalısıka fakúltetine tústi.  Qujattarymdy oqýǵa tapsyrýǵa kelgenimde qabyldaý bóliminde otyrǵan apaı maǵan balalar úıinen kelgen oqýshylarǵa jeńildik baryn aıtty. Iaǵnı men basqa talapkerler sekildi shyǵarmashylyq emtıhansyz oqýǵa qabyldana alady ekenmin. Anam meni jetim etip tastap keterde meni jetim emes músápir kúıge tastap ketken eken. Bári seni aıap, aıaýshylyq tanytqanynan asqan qorlyq joq sekildi kórindi.

Qaıta balalar úıine kelip meni óz balasynan artyq kórmese kem kórmeıtin kútýshime jylap, mán jaıdy jaıyp aıttym. İshime syımaı turǵan renishimdi odan ózgege aıta almadym. Kelesi kúni kútýshi apaıym jýrnalısıka fakúltetiniń dekanyna jolyǵyp meni ózge talapkerler sekildi shyǵarmashylyq emtıhan arqyly qabyldaýyn ótinip barypty. Árıne, yńǵaısyzdandym. Degenmen, ádil túrde oqýǵa túskim keldi. Eki aptadan soń shyǵarmashylyq emtıhanǵa ózgelermen birdeı kelip, tapsyrdym. Emtıhan jaýaby birden shyǵa qoımady. Taǵatsyzdana kúttik. Sóıtip júrgende ýaqyttyń túngi on ekini soqqanyn da baıqamaı qalyppyz. Alǵashqy emtıhannan jıyrma bes bal alyppyn. Qatty qýandym. Kelesi aýyzsha ótken emtıhannan da sátti ótip ýnıversıtetke qabyldandym.

Qazirgi tańda úshinshi kýrs stýdenti bolyp otyrmyn. Kóp dúnıeni úırendim, kóp adamdarmen tanystym. Birinshi kúni Gúlnar Ózbekova apaıymyz bizge ne úshin jýrnalısıka mamandyǵyn tańdadyńyz degen taqyrypta esse jazýǵa tapsyrma berdi. Bári televıdenıege barý úshin dep jarysa jazysty. Men de solaı dedim. Alaıda, maqsatym juldyz bolý emes, keremet maman, myqty jýrnalıs bolý emes. Atym shyqsa anam  meni tanyp maǵan keler degen úmitpen jýrnalıs mamandyǵyn tańdadym dedim. Árıne, ol úshin myqty bolýym kerek, tanymal bolýym kerek. Biraq, men osylaısha ǵana anamdy taba alamyn. Men anamdy keýdesinen ıterip, kinálap otyrmaımyn. Tek qushaǵyma qysyp meni ómirge ákelgeni úshin alǵysymdy aıtyp, qalǵan ómirinde qıyndyqqa taptyrmaı baqqym keledi... Sebebi, men anamnyń qushaǵyn saǵyndym.