Únsizdik... Uzaq ýaqytqa sozylǵan tynyshtyqty kóliktiń rúlinde otyrǵan aǵaıdyń tereń jasaǵan kúrsinisi buzyp jiberdi. Shirkin, adam ómir baqı tereń oıdyń teńizine batyp júredi. Adamdy ne tolǵandyrmaıdy deńizshi!?   

    ...Ómiriniń bar máni bolǵan, kózaıymy jalǵyz qyzy ómirge kelgeli  ákeniń qýanyshynda shek joq edi. Áıeliniń asty-ústine túsip, bar jaǵdaıyn jasap, kóziniń qarasyndaı bolǵan qulynshaǵyn barynsha mápeledi. Qyzynyń esimin – Aısha dep qoıdy . Sábıiniń jupar ısi ákeniń shynaıy baqytty sezinýine sebep bolǵandaı. Árbir jasaǵan qadamyn súısine tamashalap, tusaýyn keskizip, el qatarly bolsyn dep mektepke de berdi. Qyzy qarasa kóz tamsanarlyqtaı súıkimdi edi . Qos burymy jelpildep, kózinen ushqyn jarqyldap, mekteptiń tabaldyryǵyn attady. Kúnde keshkisin , ákesine óziniń úırengenderin aıtyp berip, ákesine sheksiz mahabbatyn kórsetetin. Qushaǵyna asylyp, erkelep, óziniń bar qalaýyn istetetin. Osylaı ýaqyt jyljyp ótip jatty. Ákeniń bar armany qyzynyń oqýyn jaqsy bitirip, bedeldi oqý ornyna túsip, myqty azamat bolýy edi.

Amal qansha? Aısha ósken saıyn ákesinen alystaı bastady. Ózi ósip, ózi oqyp-toqyp jetilgen adamdaıyn, ákesine biraz bolsyn qarsy shyǵa bastady.           9-synypqa kóshken kezde, ata-anasynyń sózin tyńdamastan  oqýǵa túsemin dep sheshim qabyldady. Erke ósken erke qyzdyń armanyna qıanat jasamaý úshin , áke kóńil esh qarsylyq bildire almady. Al , Aısha bolsa artyna burylmastan alyp shahar Astanaǵa kete bardy.

Almatynyń taza aýasy, bıiktikke boı túzegen asqar taýlary jas qyzdy qımaı turǵandaı sol kúni jańbyr esh tolastamap edi.  Múmkin, ata-anasynyń jan dúnıesindegi osy bir qınalys sezimdi kórsetkendeı. Arý Almatyda únsiz syr shertip  turdy.

   Armanyna alyp-ushyp ketken jas qyzdyń aldynda ne kútip turǵany beımálim. Ómir ony synaqqa túsirip, súrindirip, jylatyp jáne qýanta da alatynyn bilgen edi.  Stýdenttik shaqtardyń alǵashqy kúnderinen bastap, ózine jaqyn dos taýyp úlgerdi. Jaqynyndaı kórip,  qatty baýyr basyp  qaldy.  Kúni boıy dosymen qydyryp, esten ketpes baqytty sátterin ótkizip jatty. Alaıda,  óziniń ne úshin osy alyp shaharda júrgenin umytyp ketkendeı. Ata-anasyna sırek habarlasatyn boldy. Oqýyndaǵy jaǵdaıy da máz emes  edi...

      Aıaq astynan soǵylǵan qońyraý úni áke júregine bir jaman habardyń bolǵanyn jetkizgendeı. Buryn sońdy bulaı alańdap, mazasyz kúı keshe bermeıtin. Telefon tutqasyn alýǵa batyly jetpedi.  Alaıda, úzdiksiz soǵylyp qoımaǵan soń, jaýap berdi. Telefonnyń ar jaǵyndaǵy daýys bir salqyndyqty sezdirgendeı.   Bul Aıshanyń jetekshisi Dastan aǵaı  bolatyn. Qyzynyń oqýda eki aptadaı bolmaǵanyn habarlap, osylaı jalǵasa berse, oqýdan shyǵaratyny jaıly habarlady.

Tóbesinen jaı túskendeı bolǵan ákeniń kóńilin mazasyzdyq  basyp, sanasyna neshe túrli oılar kele bastady. İle-shala qyzyna qońyraý shaldy. Dereý , Almatyǵa shaqyrtty. Erteńinde qyzy artynyp-tartynyp  úıine keldi. Ata-anasynyń kózine tike qaraýǵa uıalǵan qyz eriksiz jylap qoıa berdi. Qyz baıǵustyń jasaǵan aǵat qadamy búkil ómiriniń astan-kesteńin shyǵarǵandaı. Aldaǵy ýaqytta ne bolatyny álide jumbaq?

  Qum saǵattaı syrǵyǵan ýaqytty eshkimde baǵyndyra almasy anyq. Bul Aıshanyń da qolynan kelmedi. Ótkenge ókinishi kóp bolsa da, amalsyz basyna túsken qıyndyqqa moıynusyndy. Bul joly sheshimdi ata-anasy qabyldady. Qyzyn Almatyǵa qaldyryp, osynda aqyly túrde joǵary oqý ornyna túsirdi.

     Ótken kúnderdiń paraǵynan qalǵan qara daqtardyń belgisi ,múmkin, Aıshanyń sońynan ylǵıda erip júrer. Biraq, endigi jasaıtyn qadamdarynyń ózi bolashaqta kóp nárseni ózgerte alatyny aqıqat. Ata-anasynyń  qaısarlyǵy, tabandylyǵy arqasynda qyzynyń ómiri qurdymǵa ketpeı qaıtadan qulashyn jaıǵandaı.

Eń ókinishtisi, birden barlyǵy burynǵydaı bola qoımady. Ákesi men qyzynyń  arasynda bir salqyndyq paıda bolǵandaı...

Tilegen Kógershin