Aqordanyń baspasóz qyzmeti Nursultan Ábishulynyń 15 jyl buryn Halyqaralyq áıelder kúni qarsańynda sóılegen sózderin jarıalady dep habarlaıdy «Qamshy» portaly. Elbasynyń emosıaǵa toly vıdeosyn kóre otyryp, sezimge erik bermeý qıyn.

«Analar óz balalarynan kez kelgen áıel sıaqty ár ýaqytta da jyly sózder kútetin bolar. Ásirese analar muny qatty kútetindeı. Qazir ýaqyt ótkennen keıin, erjetken soń barlyǵymyzda da analarymyzǵa ýaqytymyzdy az bólgenimiz úshin keıistik tanytyp jatamyz. Jyly sózderdi az aıttyq deımiz. «Anashym, men seni jaqsy kóremin!», dep az aıttyq. Onyń qasynda uzaq bola almaǵanyma ókinemin. Onyń meni qalaı óte jaqsy kórgenin biletinmin. Onyń osynaý súıispenshiligi meni ómirde áli kúnge deıin qoldap keledi. Tipti, mańyzdy sheshimder qabyldar kezde de ol túsime kiredi. Birden aıtaıyn, men dárýish emespin, eshqandaı balgerge de, ekstrasens pen juldyzshyǵa da senbeımin. Alaıda, ol meniń túsime enip: «Senimdi bol, bári de jaqsy bolady!» deıtin. Qazir ol tiri bolǵanda men oǵan arnaǵan hatymda óte qatty jaqsy kóretinimdi jáne ony qadirleıtindigimdi jazar edim», - dedi Nursultan Nazarbaev.

/