Mańǵystaý oblysyndaǵy Munaıly aýdanynda kóligi kóptiń qajetine jaraǵan keıýana turady. Alpysty alqymdaǵan qarıa aýdandaǵy temirjol qoımasynan Aqtaýǵa júk tasymaldaıdy dep habarlaıdy Habar 24.
Áıelge tán emes kásibin damytyp, halyq qurmetine bólenip keledi. Aýyr kólik tizginin erkin basqaratyn Nesiphan ájeı qyzmetine tıanaqty. Qajetinshe táýlik boıy jumysqa shyǵýǵa ázir. Jolda buzylyp turǵan kólik janynan ótip ketý – keıýanaǵa jat qylyq. Bul joly da ádetinen jańylǵan joq.
Kabınadan kımeshektegi ananyń shyqqanyn kórgen júrgizýshilerdiń bastapqyda abdyraıtyny ras. Dereý kapotty ashqyzyp, motorǵa úńiletin qarıa qylyǵyna eriksiz bas shaıqasady. «Saparǵa qural-saımansyz shyǵatyn qasıetterińe tańdanam» deıtin ájeı sózine máz-meıram bolysady.
Mereke kúnderi el qatarly demalýdyń ornyna keıýana qyzmetine shyǵady. Úıine erterek barýǵa suranǵan jastardyń ornyn basatyn minezi taǵy bar. Ujymynda syıly qarıa árbir meıram saıyn erekshe qurmetke bólenip júr.
Nurıa Nurymova, Mańǵystaý temirjol bólimshesi júk qoımasynyń meńgerýshisi:
-Bul kisini bizdiń júk bólimshesiniń anasy dep aıtýǵa bolady. 2007 jyldan beri bizben birge jumys isteıdi. Halyqqa qyzmet jasaıdy. Sapaly jumys kórsetip, eńbek etip jatyr. Qaırattylyǵymen, óziniń jaýapkershiligimen júk alyp, júk jiberýshilerdiń alǵysyna ıe bolyp júrgen adam.
Mańǵystaýǵa temirjolmen jetetin taýarlar osy qoımada saqtalady. Poıyz keshikse, Nesiphan ájeı de jumysta kidiredi. Tapsyrys berýshige jetkizetin júginiń sany men qujatynyń durystyǵyna kóz jetkizip alyp, jolǵa shyǵady. Barǵan jerinde alǵystan keıin mindetti qoıylar suraqtardyń bolýyna úırenip alǵan.
Nesiphan Sadırova, zeınetker:
- Jasymdy, qalaı jasap júrsiń dep suraıdy. Úıde otyrmaısyń ba deıdi, barlyǵy da suraıdy. Ózim júriske úırenip qalǵanmyn, úıde otyra almaımyn. Bir jaǵynan, densaýlyq bolǵan soń. Osy jumysym jaraıdy, bereket bersin!
Jańaózennen Munaılyǵa qonys aýdarǵan ájeı úsh ul men qyz tárbıelep, kisi qataryna qosty. Búginde alty nemere súıip otyrǵan keıýana qazynaly 70 jasqa kólik tizgininde júrip jeterine senimdi.
