QR Bilim jáne ǵylym mınıstri Erlan Saǵadıev otstavkaǵa ketýin talap etken birqatar qoǵam qaıratkerleriniń sózine jaýap berdi, dep xabarlaıdy QazAqparat. "Ol kisilerdiń mundaı málimdemelerimen tanys emespin. Ondaı sózder aıtylǵan bolsa, men ózimniń jaýabymdy beretin de shyǵarmyn. Biraq olar mundaı máseleni kótere alatyn adamdar qatarynan emes dep sanaımyn", - dedi mınıstr Úkimette ótken baspasóz máslıxatynda. Mınıstr sonymen qatar depýtat Bekbolat Tileýxannyń aqparat quraldary aldynda "jekpe-jek" ótkizý týraly usynysyna da pikir bildirdi. "Bekbolat Tileýxan BAQ aldynda pikir jarystyrýdy usyndy. Menińshe, bul durys emes. Biz ony oqýlyq jónindegi komısıaǵa shaqyrǵan edik. Búgin men Májiliske qońyraý shaldym. Onda 11 depýtat jazylǵan, solardyń qatarynda Bekbolat Tileýxan da bar. Sol komısıanyń jumysyna atsalyssyn, jumysyn kórsetsin. Men onymen baspasózde pikirtalasýǵa daıynmyn, biraq ol Úkimettiń jumysy emes", - dedi E. Saǵadıev. Eske sala keteıik, tanymal qoǵam qaıratkerleri Muhtar Taıjan men Aıdos Sarym QR Bilim jáne ǵylym mınıstri Erlan Saǵadıevke ornyn bosatýdy usynǵan bolatyn. Olar elimizdiń bas pedagogy qazaq xalqyna jáne qazaq tiline qarsy shyqty dep aıyptaǵan bolatyn.