Til úırený úshin eń kerektisi ádisteme emes, qajettilik, muqtajdyq, namys. Biz mektep bitirip, Almatyǵa kelip, ýnıversıtetke túskende biletin oryssha sózimizdiń sany júz emes, elýge de jetpeıtin. Orys tilin bireý bizge erekshe ádistememen úıretken joq nemese orys tili keremet bolǵan soń úırenip alǵan joqpyz. Kanıkýlǵa qaıtatyn kezde avtovokzaldaǵy tek orys tilinde sóıleıtin kasırden bılet ala bilý úshin, bankke barǵanda tek oryssha jazylatyn blankti toltyryp, ákemizden kelgen aqshany ala alý úshin, avtobýsta orys tilinde sóılep, seniń namysyńa tıetin sóz aıtatyndarǵa jaýap bere alý úshin, oryssha bilmegeniń úshin seni nadan sanaıtyn, kem kóretinderdiń qasynda qorlanbas úshin, dúkenderden kúndelikti qajetti zattardy satyp alý úshin, dárigerge aýyrǵan jerińdi túsindirip aıtý úshin, qazaqsha oqýlyǵy joq pánderdi túsiný úshin t.b. da osyndaı tolyp jatqan qajettilikterden úırendik. Sol zaman úıretti, sol qoǵam úıretti. Oryssha bilmeseń taksı túgil, jedel járdem de shaqyra almaıtyn bolǵan soń úırendik. Óz kúnimiz úshin úırendik. Qujattaǵy oryssha bir sózdi ádeıi emes, bilmegendikten qate jazyp qoısań, ol uly orys tilin qorlaǵandyq bolyp eseptelip, qujat ózińe qaıta laqtyrylatyndyqtan úırendik. Sol kezdegi Qazaqstanda orys tilin qoldanýshylar ǵana emes, qorǵaýshylar da kóp bolǵan soń úırendik. Eshkim bizdi erekshe ádispen, erekshe oqýlyqpen, arnaıy ýaqyt, qarajat, aýdıtorıa, muǵalim bólip úıretken joq. Endi kelip bireýler: "Qazaqsha úırenýge kitap joq, ádisteme joq, jaqsy muǵalim joq" - deıdi. Olar emes, qazaq tiline qajettilik joq. Endi Reseıden myna kisi kelipti, osydan úıreneıik degen uıat tipti. 
Negizi til - qoǵamdyq qubylys. Tildi ósiretin de qoǵam, tildi óshiretin de qoǵam.
P.s.Bir qazaq búgin «Reseıden ádistemesi kúshti, keremet polıglot kelipti, qazaqshany sol arqyly úıreneıik, ýnıversıtetke aparaıyq» degen sarynda post jazypty. Soǵan namysymnyń kelip otyrǵany.

Lázzat Dúısembekova