Qoǵam qaıratkeri, aqyn Muhtar Shahanov qazirgi tańdaǵy naýryzdy qalaı toılap júrgenimiz týraly óz oıyn aıtty. Bul týraly «Qamshy» portaly Sputniknews.kz silteme jasaı otyryp habarlaıdy.

Keńes kezeńinde ata-baba dástúrimen sabaqtasqan ulttyq meıram Naýryzdy toılaýǵa tyıym salyndy. Tek araǵa 62 jyl salyp qana 1988 jyly Naýryz meıramy qazaqqa qaıta oralǵan edi. Ulystyń uly kúnin qaıta tiriltýge Muhtar Shahanov bastaǵan bir top ult zıalylary ter tókti. Al olardyń bastamasyna sol kezde Mınıstrler keńesine tóraǵalyq etken qazirgi Memleket basshysy Nursultan Nazarbaev pen qazaq halqynyń ulttyq mádenıeti, ana tili, dástúri men ádet-ǵurpynyń jańarýyna úles qosqan memleket qaıratkeri Ózbekáli Jánibekov qoldaý kórsetti. 

1988 jyly Muhatr Shahanov Naýryz merekesin qaıta tiriltýdi surap, Kolbınge hat jazady.

Alaıda, Kolbın Naýryzdy toılaı almaıtynymyzdy aıtqan. Oǵan Muhtar Shahanov Kolbınniń aldyna baryp Naýryz merekesin túrki jurty úsh myń jyldan beri toılap kele jatqanyn, sondaı-aq meıram adamzatty tazalyqqa, adamshyldyqqa baýlıtynyn túsindirgen. Muhatr Shahanovtyń sózderi Kolbınge áser etken bolýy kerek, Gorbachevty qalaı da kóndirip, Naýryz merekesin dúıim jurt bolyp toılaıtynymyzdy aıtty.  

Sóıtip, 1988 jyly qazaqtyń óshkeni janyp, Naýryz meıramy tuńǵysh ret Almatynyń Maksım Gorkıı atyndaǵy ortalyq saıabaǵynda keń aýqymda toılanady. Ulystyń uly kúnin toılaýǵa júz myńnan astam halyq jınalǵan. Osy jyly ulttyq meıramyn saǵynǵan halyq Naýryzdy qyrkúıek aıynyń ortasyna deıin toılaǵan.  

 «Naýryz merekesin Almatyda úlken deńgeıde ótkizdik. Ulttyq kıim kıgen adamdardy kóshemen júrgizdik. Tipti túıelermen júrgizdik. Jıyrma-otyz túıe aldyrdyq. Ulttyq oıyndar oınaldy, ulttyq salt-dástúrler pash etildi. Osylaısha, úlken deńgeıde mereke boldy. İle-shala eldegi óndiris oryndary, mektepter, joǵarǵy oqý oryndary, tipti aýrýhanalarǵa deıin toılady. Mine, Keńes odaǵynyń qylyshynan qan tamyp turǵan kúnniń ózinde Naýryz merekesin osylaı búkilhalyqtyq deńgeıde toılaýǵa múmkindik alyp berip edim», — dedi ol. 

Kelesi jyly Naýryz meıramyn Ózbekstan, Qyrǵyzstan, Ázerbaıjan, Tájikstan, Túrikmenstan respýblıkalary men Reseıdiń quramyndaǵy túrkitildes ulttar memlekettik deńgeıde toılaǵan. 

 Ult janashyrynyń aıtýynsha, osyndaı qıynshylyqtarmen qazaqqa oralǵan Naýryz meıramy búginde, táýelsiz kúni, ókinishke qaraı, óz deńgeıinde atap ótilmeı keledi. Bul jaǵdaıǵa basqasha kózqaraspen qarap, Naýryz merekesin adam men adamdy, ult pen ultty jaqyndastyratyn rýhanı kúsh, rýhanı parasat deńgeıinde toılaý qajet. 

«Qazir tek qana konsert qoıady, ánshiler birinen soń biri jeńil ánderdi aıtady. Sonymen Naýryz bitti. Sondyqtan Naýryzǵa biz basqasha kózben, basqasha nıetpen qaraýymyz kerek. Bolashaqta bıliktegi adamdardy kóndirýimiz kerek,  úlken deńgeıde ótkizý bizdiń eldik, ulttyq saltymyz bolýy qajet. Naýryzda bizdiń eldik, ulttyq múddelerimiz, salt-dástúrimiz, salt-sanamyz alǵa shyǵýy tıis. Osy qasıetter alǵa shyǵýy kerek», — deıdi qoǵam qaıratkeri.