Qostanaı oblysynyń ákimi A.Muhambetov Qostanaı óńiri kóleminde 2017 jyldy «Tarıhqa taǵyzym» jyly dep belgiledi. Qostanaı óńiriniń tarıhyna qatysty birneshe jobalar Qostanaı oblysynyń ishki saıasat basqarmasy tarapynan áleýmettik tapsyrys retinde memlekettik emes uıymdar sektoryna usynyldy. Qazirgi tańda sol áleýmettik tapsyrystardy júzege asyrý múmkindigine ıe bolǵan uıymdar óz jumystarynyń josparyn jurtshylyqpen tanystyrý kezeńin uıymdastyryp jatyr. Sondaı áleýmettik jobanyń biri - "Uly Dala tulǵalary:Keıki batyr". Atalmysh joba memlekettik emes uıymdar tarapynyń keń qyzyǵýshylyǵyn týdyrdy. Sebebi Keıki batyr erligi qazaq halyqynyń qaıta oralyp jatqan rýhynyń bir rámizindeı bolyp sanalady. Byltyrǵy 2016 jyly Torǵaı kóterilisiniń 100 jyldyǵyna oraı qoǵamdyq negizde týǵan jerdiń qasıeti men qadirin qurmetteıtin azamattardyń jeke bastamasymen «Ór Torǵaı – erlik mekeni» atty dalalyq ekspedısıasy, kórnekti qoǵam qaıratkerleriniń ynta-jigerimen Torǵaı óńirinde qoǵamdyq kezdesýler ótkizilgen bolatyn. Osyndaı bastamalardyń bılik tarapynan qoldaýǵa ıe bolýy kóńildi qýantady. Mundaı tarıhı-tanymdyq mazmundaǵy jobalar jurtshylyqtyń týǵan ólkeniń tarıhyn tanýǵa degen suranysyn óteýge, jastardyń boıynda otansúıgishtik izgi qasıetterdi qalyptastyrýǵa qyzmet eteri anyq. Jobany júzege asyrý múmkindigine ıe bolǵan «Nurshańyraq» qoǵamdyq qory áleýmettik jobasynyń alǵashqy qoǵamdyq tyńdalymyn ótkizdi. Jobany tanystyrý barysynda Ult-azattyq kóterilistiń qaharmandyq hám batyrlyq erlik isterin nasıhattaıtyn respýblıkalyq deńgeıdegi debattyq týrnır, Keıki batyrdyń eline ǵylymı -aǵartýshylyq ekspedısıa, Amankeldi, Jankeldi aýdany, Arqalyq qalasy, oblys ortalyǵy turǵyndarymen, jastarymen kezdesý uıymdastyrý kózdelip otyrǵandary baıandaldy. Tyńdalymǵa Qostanaı oblysy ishki saıasat bóliminiń ókili Baımenova Záýre Ánaýrbekqyzy, memlekettik emes uıymdar jumysyn úılestirý ortalyǵynyń basshysy Ótebaeva Dınara Qaıyrbekqyzy, qoǵam belsendileri, stýdent jastar qatysty. Tyńdalymǵa jınalǵan jurtshylyq qolǵa alynyp otyrǵan jobanyń qolǵa alyp otyrǵan josparlarynyń asa mańyzdylyǵyna erekshe nazar aýdaryp, onyń sátti ótýine tilektestik bildirdi.
Ótegen Isenov, Qostanaı memlekettik ınstıtýtynyń oqytýshysy, tarıh ǵylymdarynyń kandıdaty.
