Qurama Shtattarda Sılıkon alqaby degen bar. Eldiń ǵana emes, álemniń keremet tehnologıalyq jańalyqtary jasalatyn jer. Súttiń betindegi qaımaqtary jınalǵan ǵylymı orta. Sondaǵy mektepterde ...kompúter ataýly atymen joq. Taqta men bor. Aǵash parta men taý-taý kitaptar turatyn sóreler ǵana bar. Oqýshylar uıaly telefon men planshet, aıfon men aıpad ustamaıdy. Dápter men qalam, túrli-tústi qaryndash pen sýret shımaılaǵysh qatty qaǵaz ákeledi. Aıtpaqshy, ıne men túıme, sazbalshyq pen tasburshaqty arnaıy aldyrtady. Bir kompútersiz, tipti bir ekransyz mekteptiń muǵalimderi ondaı gadjetterdi oqýshylardyń úıde de qoldanbaýyn jón sanaıdy eken. Kálkýlátor atymen joq. Eń qıyn kóbeıtý men bólýdi oqýshylar qaǵaz ben taqtaǵa shyǵarýǵa mindetti. Bir ǵajaby: osyndaı tártip Sılıkon alqabynda ǵylymı zertteýler jasaıtyn qulama ata-analardyń talaby boıynsha qalyptasqan. Osyny estigende... iship otyrǵan sháıimizge qaqala jazdadyq. Bizdiń jylda aýysyp jatatyn mınıstrlerimiz "pálen mektepti kompúterlendirip tastadyq" tańdaılaryn taqyldatýǵa sheber-aq. Beker me deımiz. Óz basymyz kóbeıtý men bólýdi áli kúnge qaǵazǵa jazyp shyǵaramyz. Bilim berý jaǵynan AQSH-tyń Sılıkon alqabynyń mektebimen deńgeıles "altyn uıalar" saqtalsyn dese, bizdiń mınıstrlik áli kompúterlenbegen aýyl mektepteriniń mazasyn almaı-aq qoısa.

Qaınar Oljaı. (Facebook-tegi paraqshasynan) 9 qyrkúıek 2014 jyl.