Qalamger, ómirde árqashan oqıǵa hám óziniń keıipkerin izdeý ústinde bolady... Birde, kúndelikti tirshilikpen tańsáride úıden jumysqa qaraı asyǵyp bara jatqan Camal, ýaqyttyń tyǵyzdyǵyna baılanysty taksı ustaýyna týra keldi. Qolyn kótergeni sol edi, lezde alǵashqy kólik te toqtaı qaldy, joly boldy degen osy shyǵar... Kóliktiń ishinde eki jolaýshy bar eken, shamasy qurbylar... tań azanymen biri ekinshisine bar sherin aqtara aǵyl-tegil jylaıdy kep... Samal, dál jandarynda otyrǵandyqtan áńgimeleri búkpesiz estilip otyrdy.
- Bilesiń be, men búgingi kúnge deıin barlyǵyna shúbásiz senip keldim... Ómirge, adamdarǵa, dosqa, mahabbatqa, jarǵa, tipti bótenge de. Alysymdy jaqyn tanyp, tanysymdy týǵanymdaı kórdim. Bala kóńildeı kúmánsiz sendim... Biraq, senimniń osynshama qıanat jasaryn, taǵdyryma sabaq bolaryn bilsemshi?! Dál bulaı senimnen de japa shegetinimdi bilgende búkil álemge senbes edim ǵoı... Sendim de súıdim, orta jolda bala-shaǵamen kóz jasyma qaramastan opasyzdyq jasaryn bildim be?! Arlanaaam... Óksik beıtanys áıeldiń tamaǵyna kelip tireldi.
Bul áńgimege kýá bolǵan Samal únsiz oı ústinde jumysqa qaraı bettedi. Naǵyz shaıqas oı ústinde bolady eken-aý sirá... Jumys ústeline jaıǵasyp, keshegi jazǵan maqalasyn pysyqtap baspaǵa usynbaq maqsatta bolsa da, bolǵan oqıǵa eshteńege múmkindik berer emes. Oı áleminde suraq-jaýap shaıqastar... Aqıqat izdedi, jaraly áıel zatynyń náziktigine qorǵan bolǵysy keldi, sarp etken kezek-kezek saýaldarǵa jaýap tapqysy keldi...
– Keıde qoǵamnan aqıqat izdep sharlaımyz, adamdar arasynda senim joǵaldy dep úkim shyǵaramyz, sezimnen adaldyq kútemiz... búgingi qoǵamda barlyǵy eseppen dep short kese núktesin qoıamyz. Máseleni kóterip saıraý ońaı, biraq kez-kelgen taǵdyrdyń túpki tarıhyna úńildik pe? Tektilikti jalǵastyrǵan namysty er azamat bolsa, búginde shańyraqtaǵy ana tiri jesir, ul-qyzy tiri jetim bolyp qalar ma edi?! Er aǵalarymyzdyń rýhy bıik bolsa shańyraqtaǵy bılikti áıelge berip, ata-analaryn qarttar úıine qańǵyrtpas edi... Azamattarymyzdyń namysy berik bolsa, kóshe boıyn qazaq qyzdary jaǵalaýshy ma edi?! Tastandylar kóbeıip, jetimder úıine kún saıyn sábıler qosylmas edi... Jaqsy qyzdar joq qoı dosym, qyzyl kitapqa engeli qaı zaman dep myrs etip, keýdemizdi keremiz... Perishtedeı adaldyq izdeý arly adamdy arlandyrar múmkin?! Aıta berseń kóp qoı jyrtyqqa jamaý izdeıtin sátteriń... Osylaı ishtegi álemimen jantalasa ishteı kúbirlep, eriksiz tamaǵyna óksik, kózine jas keldi.
Bul oqıǵadan uqqan úsh syr dep túıindedi, Samal. Senim – ǵumyrymyzdaǵy bir uzyn jip. Adaldyq – adamnyń sanasyna ǵana emes júregine baılanysty eken. Er – eldiktiń negizi ǵana emes, ómirdegi senimniń ózegi.
Oıyn jınaqtaǵandaı bolyp, eń bastysy qudireti sheksiz Allaǵa degen senim joǵalmasyn dep táýbasyna keldi...
Saltanat Esenqulova
