Osydan 7 jyl buryn ındonezıalyq eki jasar balanyń temeki shekken vıdeosy jelide keń taralyp, jurt arasynda talqyǵa salynǵan bolatyn. Ardı Rızal esimdi bul bala eki jasynan bastap kúnine qyryq tal temeki tartqan.

Onyń otbasy Sýmatra aralynda turady. Bir tańqalarlyǵy onyń ata-anasy da, aýyl turǵyndary da kishkentaı balanyń temeki shekkenine qarsy bolmaǵan. Tipti anasy balasynyń temeki tartpasa basy aınalyp, óz-ózin ıgere almaıtynyn, sondaı-aq ashýǵa boı aldyratynyn aıtqan.

Indonezıadaǵy balalardyń quqyǵyn qorǵaý uıymynyń ókili Ardıdiń «óz aınalasyndaǵylardyń qurbanyna aınalǵanyn» jetkizgen. «Bul qoǵamda adamdar burynnan shylym shegedi. Olar muny esh zıany joq ádetke balaıdy. Balany mundaı táýeldilikten aryltý qajet» degen edi olar.

Jalpy shylym shegý Indonezıada ulttyq masshtabqa ıe másele. Bul elde 80 mln bala 10 jasqa tolǵanǵa deıin temeki tartýdy úırenedi. 2008 jyly 235 mln turǵynǵa 165 mln temeki satylǵan.

Ardıdiń oqıǵasynan keıin el úkimeti balalardyń shylym shegýin toqtatý maqsatynda túrli kampanıalar uıymdastyrýdy da qolǵa aldy. Al Ardıdiń ózi ońaltý ortalyǵyna jatqyzyldy. Eresekterge arnalǵan em-dom eki jastaǵy balaǵa jaramaıtyndyqtan dárigerler onyń nazaryn basqa nársege aýdarýdy jón kóredi. Sońynda Ardı shylymnan bas tartyp, shekten tys kóp tamaq ishetin bolǵan. Ásirese quramynda qanty kóp tátti taǵasmdarǵa áýestengen. Sóıtip alty jasynda semizdik aýrýyna ushyraıdy.

Ata-anasy endi dıetologtarǵa júginýge májbúr bolady. Eki jyl degende ol qolyna ne tússe sony jeıtin ádetin doǵaryp, durys tamaqtanýǵa úırenedi. Qazir ol qatarlastarynan qalmaı ósip keledi.

Derekkóz: kulturologia.kz