Óskemendegi Sheshek asýynda bolǵan atysta qaza tapqan eki er adamnyń deneleri tabyldy. Kúdiktiler olardyń denelerin dárethanaǵa arnalǵan shuńqyrǵa tyǵyp qoıǵan, - dep habarlaıdy «Qamshy» aqparattyq agenttigi Tengrinews.kz tilshisine silteme jasaı otyryp. "Qaza tapqandardyń deneleri qala mańyndaǵy aýyl jaqtan tabyldy. Aldyn-ala málimet boıynsha, kúdiktiler er adamdardyń denelerin dárethana úshin salynyp jatqan shuńqyrǵa tyǵyp ketken. Qazir qajetti saraptamalar taǵaıyndaldy. Búgin prokýror Baǵban Taıymbetov kóńil aıtý úshin qaza tapqandardyń týystarymen kezdesip, jantúrshigerlik qylmysqa qatysty tergeýdiń qalaı júrgizilip jatqanyn aıtyp beredi", - dedi SHQO prokýratýrasynyń baspasóz qyzmetindegiler. Eske sala keteıik, osyǵan deıin Óskemendegi aǵaıyndy jigitterdiń ólimine Joǵarǵy sot pen İİD qyzmetkerleriniń qatysty bolýy múmkin ekeni aıtylǵan bolatyn. "2017 jyldyń 31 naýryzynda Shyǵys Qazaqstan oblysy Tergeý basqarmasy Óskemenniń eki turǵynynyń ólimine qatysty tergeý bastady. Aldyn-ala málimet boıynsha, qaza bolǵandardyń biri buryn S. esimdi qarjy polısıasy men Joǵarǵy sottyń qaýipsizdik qyzmetinde istegen Astana turǵynymen janjaldasyp qalǵan. Janjal kezinde astanalyq olardy atyp tastaǵan. Asa aýyr qylmysqa qatysy bar kúdikti qamaýǵa alyndy", - delingen edi prokýratýra habarlamasynda.