Búgin Jambyl oblysy Óńirlik komýnıkasıalar qyzmetinde «Mindetti áleýmettik medısınalyq saqtandyrýdy engizý» taqyrybynda brıfıń ótti dep habarlaıdy "Qamshy" aqparattyq agenttigi.

Brıfıńke spıker bolyp Jambyl oblysy ákimdigi densaýlyq saqtaý basqarmasy basshysynyń orynbasary Marat Jumanqulov jáne Medısınalyq qyzmetke aqy tóleý komıtetiniń Jambyl oblysy boıynsha departamenti basshysynyń mindetin atqarýshysy Qarlyǵash Qurmanálıeva qatysyp, óz baıandamalarymen tolyq tanystyryp, BAQ ókilderiniń suraqtaryna da aıtarlyqtaı jaýap qaıtardy.

Marat Seıtbekulynyń sózine súıensek, mindetti áleýmettik medısınalyq saqtandyrý júıesin engizý jumystary bastalǵaly beri oblys kóleminde birshama jumystar atqaryldy.

«100 naqty qadam: Barshaǵa birdeı qazirgi zamanǵy memleket» Ult josparynyń 80 qadamyn iske asyrý maqsatynda oblys ákimdiginiń qaýlysymen «100 naqty qadam «Ult josparyn» densaýlyq saqtaý salasy jáne áleýmettik damý salasynda túsindirý jónindegi Shtab quryldy.

Shtab músheleri barlyq aýdandarda turǵyndarmen kezdesý ótkizip, túsindirý jumystaryn júrgizdi.

Mindetti áleýmettik medısınalyq saqtandyrý júıesin aqparattyq-nasıhattaý jumystaryn júrgizýdiń 2-shi kezeńi barysynda 237 kezdesý ótkizilip, 57 myńdaı adam qamtyldy. BAQ-ta 26 maqala jarıalanyp, jergilikti telearnada tıisti aqparattar júrgizilýde.

            Taraz qalasynyń ortalyq kóshelerinde mindetti áleýmettik medısınalyq saqtandyrý júıesiniń basym baǵyttary kórsetilgen – 6, aýdandarda – 6, barlyǵy – 12 bılbord ornalastyryldy.

Turǵyndarǵa Call-ortalyq arqyly saqtandyrý júıesi týraly barlyq suraqtaryna jaýap alý múmkinshiligi uıymdastyryldy.

2016 jyly óńirlik Call-ortalyǵyna 3409 ótinish túsken, onyń ishinde 21 ótinish mindetti áleýmettik saqtandyrý júıesine qatysty suraqtar boldy.

2016 jyly jergilikti búdjet esebinen 5,5 mln. teńge bólinip, 292 densaýlyq saqtaý uıymdarynyń basshylary, orynbasarlary men bas esepshileri mindetti áleýmettik saqtandyrý júıesi týraly oqytyldy, - dep málimdedi basqarma orynbasary Marat Jumanqulov.