Almatyda QMDB tóraǵasy, Bas múftı Erjan qajy Malǵajyulynyń tóraǵalyǵymen ótip jatqan Ǵulamalar keńesiniń XVI otyrysynda saýda-sattyqtaǵy kepilaqsha máselesine pátýa shyǵardy dep habarlaıdy "Qamshy" aqparattyq agenttigi QMDb baspasóz qyzmetine súıene otyryp.

Kepilaqsha máselesine qatysty pátýa mátini tómendegideı: Kepilaqsha dep zatty satyp alý úshin nemese múlikti jaldaý úshin aqshasynyń bir bóligin aldyn-ala tóleýdi aıtady. Eger taýardy satyp alatyn bolsa nemese jaldaıtyn bolsa kepilaqshany sol zattyń qunyna nemese jaldaýdyń tólemine qosyp esepteıdi. Al múlik satyp alynbaǵan ıakı jaldanbaǵan jaǵdaıda kepilaqsha satýshynyń, jalǵa berýshiniń ıeliginde qalady. Kepilaqsha saýdany júzege asyrýǵa ári odan basqa zatty satyp almaýyna kepildik beredi. Sondaı-aq, ol – satyp alýshynyń zatty alýǵa nıetti ekendigin naqtylaıtyn kelisimshart. Halyqaralyq ıslam fıqh akademıasy segizinshi otyrysynda ǵalymdar kepilaqsha saýdasyna qatysty mynadaı qarar shyǵardy: «Eger kepilaqshany belgili bir ýaqytqa deıin shektep qoıyp, sosyn sol aralyqta taýardy alsa, onda aldyn ala berilgen aqsha zattyń somasyna qosylyp esepteledi. Al shart boıynsha belgilengen ýaqyttan keshikse, aqsha satýshynyń ıeliginde qalady». Úkim: – Saýda barysynda satyp alýshy zatty almaǵan jaǵdaıda kepilaqsha satýshyda qalady. – Kepilaqsha somasy jergilikti qoldanysqa qaraı taraptardyń kelisimi boıynsha belgilenedi ári ol taýar qunynyń bir bóligi bolyp esepteledi.