«Dostar! Memlekettik qyzmetterdi taǵy qalaı jeńildetip paıdalaný  jaıynda oı keldi» dep jazady «Azamattarǵa arnalǵan úkimet» korporasıasynyń tóraǵasy Abylaıhan Ospanov óziniń feısbýk paraqshasynda. Ortaǵa erekshe  usynys tastaǵan ol qalyń kópshilikten qoldaý ári keńes kútýde.

«Sizderdiń oılaryńyzdy, pikirlerińizdi surasam deımin. HQO–na barý úshin bos ýaqyt tabýdyń óte qıyn ekenin biz barlyǵymyz bilemiz. Anyqtamalar men qujattardy retteý júıeli túrde júretini de belgili. Al e-gov.kz elektrondy júıesin paıdalanatyndar úshin bul jaǵdaı qıyndyq týǵyzbaıdy. Olar kóptegen qyzmetterdi onlaın paıdalana alady. Biraq bul másele sonda da aktýaldy, sol sebepten biz astanadaǵy bir HQO-nyń  jumys kestesin tún ortasyna deıin uzartýdy usynyp otyrmyz. Bul adamdarǵa jumystan keıin kelip memlekettik qyzmetti paıdalanýyna jol ashady. Árıne, bul «Azamattarǵa arnalǵan úkimetke» qatysty, al tirkeý jáne qujattandyrý qyzmetteri óz kestesimen júredi» deıdi Abylaıhan Ospanov.