Bıznesmen Álıdar Ótemuratov jáne DAR IT-kompanıasy otandyq jáne sheteldik fılm men mýzykanyń keń qoryna qol jetkizýge múmkindik beretin tuńǵysh qazaqstandyq strımıngtik servısti jurtshylyqqa tanystyrdy dep habarlaıdy Qamshy aqparattyq agenttigi.
Otandyq shoý-bıznes ókilderine, mýzyka jáne kınoındýstrıa qaıratkerlerine, BAQ ókilderine arnap uıymdastyrylǵan tanystyrylymda kelesi tulǵalar sóz sóıledi:
- Álıdar Ótemuratov, DAR kompanıasynyń negizin salýshysy jáne basshysy;
- Nasyr Jumalıev, DAR Play jobasynyń basshysy;
- Ahat Ybraev, rejıssór, Qazaqstan kınematografshylar odaǵynyń tóraǵasy;
- Baýyrjan Shúkenov, «Arman» kınojeliler dırektory jáne Batyrhan Shúkenov shyǵarmashylyǵynyń quqyq ıesi.
«Bizdiń maqsatymyz – tehnologıalar kómegimen sapaly kontentti tutyný mádenıetin damytý, Qazaqstannyń barlyq azamattaryna kıno jáne mýzyka týyndylaryna qol jetkizýge múmkindik berý, – dep túsindirdi Álıdar Ótemuratov. – Sondaı-aq, biz quqyq ıelerine óz shyǵarmashylyǵynan qarjy tabýǵa, al tutynýshylarǵa eń jaqsy sapada mýzyka tyńdap, fılmderdi yńǵaıly ári ońaı jolmen kórýge múmkindik berip otyrmyz».
Otandyq ınternettiń eń kókeıtesti máseleleriniń biri – jergilikti zańdy mýzykalyq jáne beınekontenttiń joqtyǵynda. Qazir otandyq mýzyka men kıno ǵalamtorda tek qaraqshylyq resýrstarda ǵana taratylady. Al DAR Play servısi osy máseleni sheshýdi kózdep otyr.
«Osy iske qatysatyndardyń barlyǵy budan utady. Mýzyka oryndaýshylar kóbirek ýaqytyn shyǵarmashylyq pen jańa ánderdi jazýǵa arnaıtyn bolsa, kıno óndirýshiler óz fılmderin shyǵarýǵa kóbirek qarjy bólýge múmkindik alady, óıtkeni kınoteatrlardaǵy prokat aıaqtalǵan soń da bul ónimder olarǵa tabys ákeletin bolady. Tyńdarmandar men kórermender bolsa, sapaly kontenttiń eń keń qoryna qol jetkizedi», - dep atap ótti Ótemuratov myrza.
DAR Play servısi aıasyndaǵy jumys 2016 jyldyń sońynda bastalǵan bolatyn. Quıylǵan ınvestısıalar kólemi 900 mln. teńgeden astam.
Qazirgi tańda DAR Play qoldanýshylarynda 19 myńnan asa tolyq metrajdy fılm, múltfılm men serıaldy tamashalap, sondaı-aq, búkil álemdegi 100 myń oryndaýshynyń 2,2 mln. ánin tyńdaýǵa múmkindigi bar. Jyl sońyna qaraı DAR Play qory 3 mln. trek jáne 45 myń kınofılmge deıin tolyqpaq.
