"Qaırat" - "Ertis" machynan keıin Eldos Ahmetov jankúıermen tóbelesýge shaq qaldy, dep habarlaıdy Qamshy aqparattyq agenttigi Vesti.kz portalyna silteme jasap.

"Qaırat" jankúıerleri almatylyq klýbtyń qorǵaýshysy Eldos Ahmetov pen jankúıerlerdiń biri "Ertiske" qarsy oıynnan keıin sózge kelip, janjaldasyp qalǵanyn aıtyp berdi. 
Mach sońynan keıin "Qaırat" fýtbolshylary jankúıerlerge alǵys aıtý úshin stadıondy aınalyp ótti. Sol kezde Ahmetov klýb jankúıerleriniń birimen janjaldasyp qaldy. Tóbelestiń aldyn "Qaırattyń" ózge fýtbolshylary alypty. 
"Eldostyń bul qylyǵy durys emes. Saǵan ne aıtsa da, jankúıerdi jekpe-jekke shaqyrý oryndy bolmady. Men bolǵan jáıtti tolyq kórdim dep aıta almaımyn. Biraq oıynnan keıin jankúıerlerdiń biri oǵan emosıamen bir sóz aıtyp qaldy. Ol jankúıer "Qaırattyń" resmı jankúıerler tobyna kirmeıdi. Ahmetov toqtaı almaı, jankúıerge qaraı bet aldy. Kishigirim qaqtyǵys boldy dese de bolady. Eldos oǵan jekpe-jekke shyǵýdy usyndy. Jankúıer sabyrly eken. Jekpe-jekten bas tartty. Bul kezde biz komandamen sóılesip jatyr edik. Sondyqtan bolǵan jáıtti egjeı-tegjeıli aıtyp bere almaımyn", - deıdi osy jaǵdaıdy kórgen kýágerlerdiń biri, "Alataý-Fans" jankúıerler tobynyń múshesi Islam Azanbaekıev. 
Bul jaǵdaı 11 sektordyq qasynda bolǵan. Osy jerde bolǵan "Qaırattyń" FanRegion05 jankúıerler tobynyń múshesi Álim Dinasylov bolǵan jaǵdaıdy tolyq kórgenin aıtady. 
"Machtan soń bizdiń sektordyń janynda bir er azamat fýtbolshylardy kútip turdy. Ol Markovıchti, Arzony, Súıimbaevty jáne Plotnıkovty maqtap turǵan. Solardan keıin Ahmetov keldi. Sol kezde ol er azamat Ahmetovke qaraı "ót sóndirýshi", - dep aıqaılady. Al Elodos bolsa jaýap retinde birneshe sóz aıtty. Jankúıer bolsa: "Sen tek sózben ǵana birnárse isteı alasyń", - dedi. Ahmetov osy kezde ashýlanyp, qorshaýdan asyp, jankúıerge qaraı júgire bastady. Biraq ony Plotnıkov men Súıimbaev ustap qaldy. Árıne, jankúıerler ár kez qoldap júrgen fýtbolshylardan mundaı áreketti kórgen jaman", - deıdi Dinasylov.